بۇگىندە ەسترادا وكىلدەرى وزگە ەلدىڭ ءانىن قازاقشا ورىنداۋدى جولعا قويىپ العان.
ورتالىق ازيا ەلدەرى، ونىڭ ىشىندە وزبەكستان مەن قىرعىزستان سازگەرلەرىنىڭ تۋىندىسىن قازاقشا سايراتۋ سانگە اينالعان. ەسترادا انشىلەرى يوردانيا سازگەرلەرىنە دە جيەندىك جاساۋدى ار سانامايتىن كورىنەدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
وتاندىق انشىلەردىڭ تاماشا تۋىندىلاردى قۇرلىق اسىرىپ اكەپ ورىنداپ جۇرگەنىن بىلەمىز. دەسە دە قازاقستاننىڭ ەڭبەك سىڭىرگەن قايراتكەرى، ونەر زەرتتەۋشىسى، سازگەر جانعالي جۇزبايەۆ ءوز قۇندىلىعىمىزدى دارىپتەۋ مىندەت ەكەنىن ايتتى.
«بيىل كۇزدە استانادا دۇنيەجۇزىلىك كوشپەندىلەر ويىنى وتەدى. وسىناۋ داقپىرتى باسىم دودادا ءبىز توي تويلاۋدى عانا ەمەس، ۇلتتىق سپورتىمىزبەن قاتار ونەرىمىزدى دە دارىپتەي ءبىلۋىمىز كەرەك. مادەنيەتىمىزدىڭ ۇستىنىن تانىتىپ، تۇركى الەمىندە ونەرىمىزدىڭ سالتاناتىن كورسەتەتىن مۇمكىندىك ەكەنىن ەستەن شىعارماعان ءجون. شەتەلدەن كەلەتىن قوناقتاردىڭ الدىندا وتكىزەتىن كونسەرتتىك شارانى دا ۇلتتىق قۇندىلىققا قاراي يكەمدەگەن ابزال. ونى ايتقانىم، بىزدە كەيدە ءبىر كەلەڭسىزدىك ورىن الادى. اۋقىمى كەڭ كونسەرتتىك ءىس-شارا وتكىزىپ، الىس-جاقىن شەتەلدەن دە ونەرپازدار قاتىسقان دۋماندا انشىلەرىمىز شىرقاعان تۋىندىسىن تىڭداعاندا ۇيالىپ تا قالامىز. ويتكەنى بۇگىنگى ەسترادا ساحناسىندا ءان شىرقاپ جۇرگەن انشىلەردىڭ كوپشىلىگى قىرعىز، وزبەك، قاراقالپاق، ارميان حالقىنىڭ اندەرىن الادى دا، قازاقشالاپ ورىندايدى. پارسى مادەنيەتىنە دە قول سالدىق، ءتىپتى، يوردانيادان دا ءان الدىق. ءارى وسىنداي كىرمە تۋىندىلاردىڭ ناسيحاتى سۇراپىل: تەلەارنادان دا كورسەتىپ، راديودان دا تاراتادى»، - دەدى ج.جۇزبايەۆ.
ونەر زەرتتەۋشىسى ەلىمىزدە زياتكەرلىك مەنشىكتىڭ ءتارتىبى ءجيى بۇزىلاتىندىقتان دا شەتەلدىك سازگەرلەر انشىلەرگە ءجيى شاعىم ايتاتىنىن جەتكىزدى.