ماسكەۋدە قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات ءجۇماعاليدىڭ رەسەيدىڭ باس پروكۋرورى يگور كراسنوۆپەن ەكىجاقتى كەزدەسۋى ءوتتى، دەپ حابارلايدى اlmaty-akshamy.kz.
كەزدەسۋ بارىسىندا ەكىجاقتى ىنتىماقتاستىقتىڭ، ونىڭ ىشىندە ءوزارا قۇقىقتىق كومەك كورسەتۋ، سيفرلىق شەشىمدەردى پايدالانۋ، ادامداردى ىزدەستىرۋ، وقىتۋدى ۇيىمداستىرۋ، بىرلەسكەن جوبالاردى ىسكە اسىرۋدىڭ باسىم ماسەلەلەرى تالقىلاندى.
زاڭسىز ساتىپ الىنعان اكتيۆتەردى مەملەكەتكە قايتارۋ، ولاردى قارجىلىق تەرگەۋ جۇرگىزۋ كەزىندە انىقتاۋ ماسەلەلەرىنە ەرەكشە نازار اۋدارىلدى.
ءىس-شارا بارىسىندا ا.جۇماعالي اگەنتتىكتىڭ قىزمەتىنە جانە ەلدەگى جەمقورلىققا قارسى ءىس-قيمىل بويىنشا قابىلدانىپ جاتقان شارالارعا ەگجەي-تەگجەيلى توقتالدى.
«ءبىز اگەنتتىكتىڭ جۇمىسىندا الدىن الۋ جانە قىلمىستىق-قۇقىقتىق قۇرالداردىڭ تەڭگەرىمىن سانالى تۇردە قامتاماسىز ەتۋگە تىرىسامىز، جەمقورلىقسىز قوعام قۇرۋ ماقساتىندا ازاماتتارمەن بەلسەندى قارىم-قاتىناس جاسايمىز. ءبىز ءوزارا ءىس – قيمىل ءۇشىن اشىقپىز جانە بىرلەسكەن جوبالاردى ىسكە اسىرۋعا دايىنبىز»، - دەدى ا.جۇماعالي.
كەزدەسۋ اياسىندا رەسەي پرەزيدەنتى اكىمشىلىگى مەن باس پروكۋراتۋراسىنىڭ وكىلدەرى قازاقستاندىق دەلەگاسيانى «پوسەيدون» جەمقورلىق جانە وزگە دە قۇقىق بۇزۋشىلىقتاردىڭ الدىن الۋ جونىندەگى اقپاراتتىق-تالداۋ جۇيەسىمەن تانىستىردى. بۇل جۇيە دەكلاراسيالاۋ جونىندەگى تالاپتار قولدانىلاتىن تۇلعالاردىڭ كىرىستەرى مەن شىعىستارى تۋرالى اقپاراتتى جيناۋدى جانە وڭدەۋدى جۇزەگە اسىرادى.
ا. جۇماعالي «مۇنداي جۇيەلەر جەمقورلىققا قارسى كۇرەستىڭ تيىمدىلىگىنە ءسوزسىز اسەر ەتىپ، ەنگىزىلىپ جاتقان كىرىستەر مەن شىعىستاردى جالپىعا بىردەي دەكلاراسيالاۋ جۇيەسى شەڭبەرىندە نەگىزسىز بايىتۋدى باقىلاۋدى جۇزەگە اسىرۋ كەزىندە قازاقستاندا قولدانۋ تۇرعىسىنان زەردەلەنەدى.
جالپى، مەملەكەتتىك قىزمەتتەردى سيفرلاندىرۋ، ادامي فاكتوردى الىپ تاستاۋ، بيزنەس پروسەستەردىڭ اشىقتىعى، «اقشانى بوياۋ» تەتىگىن ەنگىزۋ، دەرەكتەر بازاسىن ينتەگراسيالاۋ جەمقورلىقتى ەداۋىر ازايتۋعا مۇمكىندىك بەرەدى» دەپ اتاپ ءوتتى.
ەكىجاقتى كەزدەسۋدىڭ قورىتىندىسى بويىنشا ەكى ەلدىڭ ورگاندارى اراسىندا ءوزارا تۇسىنىستىك تۋرالى مەموراندۋمعا قول قويىلدى.
كەزدەسۋ سوڭىندا اگەنتتىك ءتوراعاسى ا. جۇماعالي رەسەيلىك ارىپتەستەرىنە ءىس-شارانى ۇيىمداستىرعاندارى ءۇشىن العىس ءبىلدىرىپ، الداعى جۇمىستارىنا تابىس تىلەدى.