«بۇگىنگى كۇن – ەرتەڭگى تاريح ...»
جاقىندا قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ شەكارا اكادەمياسىنا اتى الەمگە ايگىلى وتانداسىمىز ديماش قۇدايبەرگەن كەلدى، دەپ حابارلايدى اlmaty-akshamy.kz.
تانىمال ءانشىنى شەكارا اكادەمياسىنىڭ ۇجىمى ول كەلگەنشە تاعاتسىزدانا كۇتتى. ديماش كەلەدى دەگەندى ەستىگەن كۋرسانتتار ونى كورۋگە قاتتى اسىعىپ، قولدارىنا ءبىر-بىر قۇشاق گۇلدەرىن الىپ تاپجىلجىماي اكادەميا الدىندا تۇردى. التىن داۋىستى ءانشىنى اكادەميا باستىعىنىڭ ءبىرىنشى ورىنباسارى پولكوۆنيك ا.يسمايلوۆ جانە باسشىلىق قۇرام قارسى الدى.
ءبىر قىزىعى ديماش قانات ۇلى وسى ۋاقىتقا دەيىن بىردە-بىر مەكەمەگە ءدال وسىلاي كەزدەسۋگە بارماعان ەكەن. بۇل ءانشىنىڭ ەڭ ءبىرىنشى كەزدەسۋى دەپ ايتساق ارتىق بولماس. ارينە، بۇل شەكاراشىلار ءۇشىن ۇلكەن قۋانىش، ءارى ماقتانىش!
بايقاعانىمىزداي ەسىمى الەمگە ايگىلى ديماش قۇدايبەرگەن ۇلىق بولساڭ كىشىك بول دەمەكشى، قانشا جەردەن تانىمال بولسا دا تاكاپپارلىققا بوي الدىرماي ءوزىنىڭ تابيعي قاراپايىمدىلىعىن جوعالتپاعان. سويلەگەن سوزىنەن، سويلەۋ مادەنيەتىنەن، جۇرگەن ءجۇرىسى، كيگەن كيىمىنەن قاراپايىمدىلىقتىڭ ءيسى اڭقىپ تۇر. بۇل دەگەنىمىز – اتا-اناسىنىڭ بەرگەن ءتالىمدى تاربيەسىنىڭ ارقاسى ەكەنى انىق.
انشىمەن سۇقبات بارىسىندا پولكوۆنيك د.بەلگوجايەۆ پەن مايور ا.دوستايەۆ وعان ەكى تىلدە سۇراق قويىپ، كەزدەسۋدى جۇرگىزىپ وتىردى. ورىس تىلىندە قويىلعان ساۋالدارعا تەك مەملەكەتتىك تىلدە جاۋاپ بەرگەن ديماش تاعى ءبىر قىرىنان كورىنىپ ءتىل جاناشىرى ەكەنىن بايقاتىپ، كەزدەسۋ سوڭىنا دەيىن انا تىلىندە سويلەدى.
ساحنا تورىندەگى جايلى ورىندىققا جايعاسقان انشىگە زال تولى كورەرمەندەر وزدەرىنىڭ كوكەيدەگى ساۋالدارىن قويدى. شەكاراشىلاردىڭ قارا قازانىنا اينالعان قارا شاڭىراقتاعى قىزىقتى كەزدەسۋدە كۋرسانتتاردىڭ ءبىرى وعان جاسىل كۇنقاعارلى شەكاراشىلاردىڭ فۋراجكاسىن سىيعا تارتسا، ەندى ءبىرى الەكساندر بەكتىڭ «ارپالىس» اتتى كىتابىن تارتۋ ەتتى. ال، ەندى ساناۋلى ايلاردان سوڭ قوس جۇلدىزدى يىعىنا قاداپ لەيتەنانت اتاناتىن ءبىتىرىۋشى تۇلەكتەردىڭ ءبىرى كۋرسانت ن.الداجۇمان ديماش اعاسىن وزدەرىنىڭ ماۋسىم ايىندا ءبىتىرۋشى لەيتەنانتتار كەشىنىڭ قۇرمەتتى قوناعى بولۋعا ءوتىنىش جاسادى. ءارى قاراي، شەكارا اكادەمياسىنىڭ ءانۇرانىن ناقىشىنا كەلتىرە شىرقادى.
ءوز كەزەگىندە «جاس شەكاراشى» بالالار اسكەري-پاتريوتتىق كلۋبىنىڭ تاربيەلەنۋشىلەرى دە انشىگە ءبىر قۇشاق گۇل مەن «قازاقستان» شوكولادىن سىيعا بەردى. كەزدەسۋ بارىسىنداعى قىزىقتى اڭگىمەنى مۇقيات تىڭداعان كۋرسانتتار مەن اسكەري قىزمەتشىلەر مۇنداي قايتالانىپ كەلمەس تاريحي ءساتتى قالت جىبەرمەي، كەزەك-كەزەك ەستەلىككە سۋرەتكە ءتۇسىپ، مارە-سارە بولدى.
ۇقك شەكارا اكادەمياسىنىڭ تاربيەلىك، الەۋمەتتىك-قۇقىقتىق جانە يدەولوگيالىق جۇمىستار باسقارماسى باستىعىنىڭ ورىنباسارى پولكوۆنيك داۋرەن بەلگوجايەۆ باسقارما ۇجىمىمەن، كەزدەسۋدى ۇيىمداستىرىپ، ارىپتەستەرىنە ەستە قالارلىقتاي ۇمىتىلماس تاريحي ساتتكە باستاماشىلدىق تانىتتى.