«قازجولعزي» اق «سۋپەراسفالت» تەحنولوگياسىن قازاقستانعا ەنگىزۋ ءۇشىن ۇلتتىق ستاندارتتاردى ازىرلەۋدى جالعاستىرۋدا.
وسىعان وراي، وتاندىق عالىمدار وسى تەحنولوگيانى ازىرلەۋشىلەردىڭ ءبىرى، پروفەسسور حۋسسەين باحيامەن جانە Honeywell (اقش) كومپانياسىنىڭ وكىلدەرىمەن كەزدەستى. ىنتىماقتاستىق اياسىندا جولداردىڭ ۇزاق مەرزىمدىلىگىن جانە تيىمدىلىگىن ارتتىرۋعا باعىتتالعان وزىق تەحنولوگيانى ەلىمىزدىڭ جولدارىنا بەيىمدەۋ مۇمكىندىكتەرى تالقىلاندى، دەپ حابارلايدى aqshamnews.kz.
امەريكالىق ساراپشىلارمەن ىنتىماقتاستىق ادىستەمەلىك جانە عىلىمي-پراكتيكالىق دەڭگەيدە جۇزەگە اسىرىلىپ، جوندەۋارالىق مەرزىمدەردى ۇلعايتۋعا جانە پايدالانۋ شىعىندارىن ازايتۋعا باعىتتالعان.
«سۋپەراسفالت» ادىستەمەسىن ەلىمىزدىڭ اۆتوجول جوبالارىنا كەزەڭ-كەزەڭىمەن ەنگىزۋ بويىنشا 2025–2030 جىلدارعا ارنالعان جول كارتاسى ازىرلەندى. بۇل ادىستەمە اقش، رەسەي جانە باسقا دا ەلدەردە ءساتتى جۇزەگە اسىرىلعان. ونىڭ ءبىرىنشى كەزەڭى — ۇلتتىق ستاندارتتاردى ازىرلەۋ. قازىرگى ۋاقىتتا «قازجولعزي» «سۋپەراسفالت» تەحنولوگياسىن ەنگىزۋ ءۇشىن قاجەتتى ءۇش نەگىزگى ۇلتتىق ستاندارتتى ازىرلەۋدى اياقتاۋدا. كەلەسى جىلى پيلوتتىق جوبا اياسىندا جاڭا ستاندارتتار بويىنشا العاشقى اسفالتبەتون جامىلعىلارىنىڭ العاشقى كيلومەترلەرى سالىنادى»، — دەپ اتاپ ءوتتى «قازجولعزي» اق ۆيسە-پرەزيدەنتى ەرىك امىربايەۆ.
الداعى جىلدارى پيلوتتىق جوبالارعا عىلىمي-تەحنيكالىق قولداۋ كورسەتۋ جانە تاجىريبەلىك ۋچاسكەلەردى باقىلاۋ جۇزەگە اسىرىلاتىن بولادى. ناتيجەسىندە «سۋپەراسفالت» تەحنولوگياسىنىڭ تيىمدىلىگىنە باعا بەرىلىپ، جاڭا ستاندارتتارعا كوشۋ تۋرالى شەشىم قابىلدانادى.
ادىستەمە بەلگىلى ءبىر ايماقتارداعى بيتۋمدى بايلانىستىرۋشى ماتەريالداردىڭ پايدالانۋ جاعدايلارىن، سونداي-اق كولىك جۇكتەمەلەرى مەن قوزعالىس قارقىنىن ەسكەرەدى. بۇل ستاندارتتاردى ەنگىزۋ ەل ينفراقۇرىلىمىن جاڭعىرتۋداعى ماڭىزدى قادام بولىپ، جولداردىڭ قىزمەت ەتۋ مەرزىمىن ايتارلىقتاي ارتتىرىپ، ولاردى كۇتىپ ۇستاۋعا كەتەتىن شىعىنداردى ازايتادى دەپ كۇتىلۋدە.
ايتا كەتەيىك، الەمنىڭ 120-دان استام ەلىندە تابىستى قولدانىلاتىن «سۋپەراسفالت» تەحنولوگياسى كليماتتىق جاعدايلارعا جانە قارقىندى ترافيككە جوعارى ءتوزىمدى جول جابىندارىن جوبالاۋعا مۇمكىندىك بەرەدى. بۇل بەس كليماتتىق ايماعى بار قازاقستان ءۇشىن اسا وزەكتى ماسەلە.