قازاقستاندا پاترۋلدىك پوليسيا قىزمەتكەرلەرىنە يشارا ءتىلىن ءبىلۋ مىندەتتەلگەنى جايىندا ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ ايتتى، دەپ حابارلايدى aqshamnews.kz.
ونىڭ ايتۋىنشا، يشارا ءتىلىن ءبىلۋ پوليسيا قىزمەتكەرلەرىنە ەستۋ قابىلەتى بۇزىلعان ادامدارعا كومەكتەسۋ كەزىندە جانە توتەنشە جاعدايلاردا جەدەل ارەكەت ەتۋگە كومەكتەسەدى.
ەرەكشە قاجەتتىلىكتەرى بار ادامدار ءجيى قيىن نەمەسە ءقاۋىپتى جاعدايلارعا تاپ بولادى. سوندىقتان ءبىزدىڭ بارلىق پاترۋلدىك پوليسيا قىزمەتكەرى ادامعا قولداۋ جانە قاجەتتى كومەك كورسەتۋگە مۇمكىندىك بەرەتىن قاراپايىم قيمىلداردى مەڭگەرەدى. بۇل – جاي عانا رەسميلىك ەمەس، ادام ءومىرىن ساقتاپ قالاتىن ماڭىزدى داعدى، – دەدى شىڭعىس الەكەشيەۆ.
ونىڭ ايتۋىنشا، ءاربىر پاترۋلدىك قىزمەتكەر «ۋايىمداماڭىز، پوليسيا سىزبەن بىرگە، ءبىز سىزگە كومەكتەسەمىز» دەگەن سوزدەردى ىممەن كورسەتە ءبىلۋى كەرەك.
بۇل اسىرەسە اۋدارماشى تابۋعا ۋاقىت جوق نەمەسە قاراپايىم، ءبىراق ماڭىزدى حاباردى جەدەل جەتكىزۋدى قاجەت ەتەتىن توتەنشە جاعدايلاردا وتە ماڭىزدى. بۇل ءتاسىل پوليسياعا ەستۋ قابىلەتى بۇزىلعان ادامدارمەن تەز بايلانىس ورناتۋعا مۇمكىندىك بەرەدى، – دەدى مينيسترلىك وكىلى.