اۋىل بالالارىنا دا ەۋروپانىڭ اتاقتى فۋتبول كلۋبتارىندا ونەر كورسەتۋ مۇمىندىگى تۋدى.
«قازاقستان» تەلەراديوكورپوراسياسىنىڭ «قازسپورت» تەلەارناسىنان «Super bol!» جوباسى ەفيرگە شىعادى. ماقساتى - تەڭبىل دوپتى شىر ۇيىرەتىن شەبەرلەردى انىقتاۋ. كەشە سەمەيدە، ال بۇگىن پاۆلوداردا 16-25 جاس ارالىعىنداعى دارابوزدار كاستينگتەن ءوتتى، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
جەڭىمپازدار «قازسپورت» تەلەارناسىندا تىكەلەي جۇرگىزىلەتىن رەاليتي-شوۋعا قاتىسادى.
سەرىكبول ءوزىن وتاندىق كلۋبتاردا ويناپ جۇرگەن فۋتبولشىلاردان كەم كورمەيدى. جاسىل الاڭداعى ايشىقتى قيمىلىمەن جۇزدەگەن ستۋدەنت ۇلگى تۇتار تۇلعاعا دا اينالدى. وقۋىن ءبىتىرىپ، ماماندىق يەسى اتانعان سوڭ، ەندى كاسىبي فۋتبولدا باعىن سىناپ كورمەك.
"بۇل جەردە ەشقانداي تانىستىق ءرولى وينامايدى دەپ ويلايمىن. سەبەبى كەز كەلگەن بالا تىركەلۋگە كەلگەن كەزدە، ول تانىسى، تانىسى ەمەس، قانداي نومەر الاتىنى بەلگىسىز. سوندىقتان بۇل جوبا - كەرەمەت مۇمكىندىك. سۋپەرلەردىڭ اراسىندا سۋپەر بولۋعا تىرىسامىز. مەن 100 پايىز دايىنمىن!" - دەدى «Super bol!» جوباسىنا قاتىسۋشى سەرىكبول ناقىسبەك.
«Super bol!» جوباسىنا تەڭبىل دوپتىڭ سوڭىنا تۇسكەن 130-عا تارتا ۇمىتكەر كەلدى. ولار وسى جەردە توپ-توپقا ءبولىنىپ شەبەرلىكتەرىن سىنايدى. مىقتىلاردى التى سكاۋت انىقتايدى.
جوبانىڭ حەدلاينەرلەرى - داۆيد لوريا مەن سامات سماقوۆ. ەكەۋى دە «ەرتىس» فۋتبول كلۋبىندا ۇزاق جىل ونەر كورسەتىپ، جانكۇيەر سۇيىكتىسىنە اينالعان.
"ناعىز مىقتىلار اۋىلدان شىعادى. ءبىراق كوبى سول جاقتا قالىپ قويادى. ءبىزدىڭ جوبانىڭ ماقساتى - سولاردى انىقتاپ، باپتاپ، ۇلكەن ويىندارعا سالۋ. ارينە، قالالىق جەرلەردەگى جاستار دا قاتىسادى. بۇگىن ۇمىتكەرلەردىڭ قايرات جىگەرلەرىن سارپ ەتىپ بارىنشا سىنايتىن بولامىز"، - دەدى «Super bol!» جوباسىنىڭ باس مەنەدجەرى داۆيد لوريا.
كاستينگ ماۋسىمنىڭ اياعىنا دەيىن ەلىمىزدىڭ 8 قالاسىندا وتكىزىلەدى. 150 ويىنشى ىرىكتەلىپ، ولار الماتىدا سىنالادى. ول جەردە 50 ۇمىتكەر قالىپ، ەكى اي بويى ۇلتتىق قۇراما جاتتىعاتىن تالعارداعى بازادا «قازسپورت» تەلەارناسىندا تىكەلەي جۇرگىزىلەتىن رەاليتي-شوۋعا قاتىسادى.
"سوڭعى ويىن بولادى، فينالدىق ويىن. ول ويىندا ەۋروپانىڭ كلۋبتارىنىڭ، وسى قازاقستان كلۋبتارىنىڭ سكاۋدتەرى دەيمىز عوي، سەلەكسيا جاسايتىن ادامدارى كەلىپ كورەدى. وزدەرىنە ۇناعان ويىنشىلاردى كەلىسىمشارتقا الاتىن بولادى. ەڭ باستىسى، وسى ويىنشىلارعا مۇمكىندىك بەرۋ"، - دەدى «Super bol!» جوباسىنىڭ كرەاتيۆتىك پروديۋسەرى ايدىن قوجاحمەت.
جوبا تامىزدىڭ سوڭىندا قورىتىندىلانادى. ەڭ مىقتى 22 ۇمىتكەر انىقتالىپ، ولار كاسىبي كلۋبتاردىڭ بىرىمەن كەزدەسۋ وتكىزەدى. ىلە شەتەلدىڭ اتاقتى كلۋبتارىنا ءتالىم الۋعا جىبەرىلەدى.