فيليپپين بيلىگى سەبۋ پروۆينسياسىندا بولعان ءزىلزالادان قازا تاپقاندار سانى ارتۋى مۇمكىن دەپ قاۋىپتەنىپ وتىر. ءقازىر قۇتقارۋ جانە قالپىنا كەلتىرۋ جۇمىستارى ءجۇرىپ جاتىر، - دەپ حابارلايدى aqshamnews.kz ءتىلشىسى.
جويقىن جەر سىلكىنىسىنەن كەم دەگەندە 69 ادام كوز جۇمدى. ودان بولەك ونداعان ادام جاراقات الدى. قازا بولعاندار سانى ءالى كوبەيۋى ىقتيمال. بۇل اپات ەلدىڭ ورتالىق بولىگىن شارپىدى.
Miss Asia Pacific International سۇلۋلىق بايقاۋى ءوتىپ جاتقان ساتتە دە ءدۇمپۋ بولدى. ۆيدەودا قاتىسۋشىلار مەن قوناقتار ساحنادان قاشىپ شىققانى، توبەدەن سىلاق پەن اشەكەي بولىكتەرىنىڭ جەرگە قۇلاعانى انىق كورىنەدى. ەconomictimes.indiatimes.com مالىمەتىنشە، ەشكىم زارداپ شەكپەدى.
جەر سىلكىنىسىنىڭ ماگنيتۋداسى – 6،9. ەپيسەنترى سەبۋ ارالىنداعى بوگو قالاسىنان 17 شاقىرىم سولتۇستىك-شىعىستا ورنالاسقان. پروۆينسيادا توتەنشە جاعداي جاريالاندى.
قۇتقارۋشىلار ۇيىندىلەر استىندا قالعانداردى ىزدەپ جاتىر. بيلىك حالىققا كومەك جەتكىزۋدى ۇيىمداستىرىپ جاتىر.
ءزىلزالا ايماعىندا ونداعان عيمارات تولىق نەمەسە جارتىلاي قيراعان. ەلەكتر جارىعى وشكەن، جولدار مەن كوپىرلەردە جارىقتار پايدا بولعاندىقتان كولىك قاتىناسى قيىندادى.
بۇل جەر سىلكىنىسى ايماققا "بۋالوي" جانە "راگاسا" اتتى داۋىلدار سوققاننان كەيىن ءبىر اپتا وتپەي بولدى. فيليپپين – تىنىق مۇحيتىنىڭ "وتتى بەلدەۋىندە" ورنالاسقاندىقتان، ءجيى جەر سىلكىنىسى مەن جانارتاۋ اتقىلاۋىنا ۇشىرايتىن ەل.