قوستانايدا تاكسيدەن قۇلاپ كەتكەن 65 جاستاعى زەينەتكەردى كولىك باسىپ كەتتى، - دەپ حابارلايدى اqshamnews.kz ءتىلشىسى ng.kz-كە سىلتەمە جاساپ.
وقيعا 1 قازاندا ساعات 16:42-دە التىنسارين مەن گوگول كوشەلەرىنىڭ قيىلىسىندا بولدى.
بەينەجازبادا تاكسي بۇرىلىپ جاتقاندا ەسىگى اشىلىپ كەتىپ، سالوننان جولاۋشى ايەل قۇلاپ تۇسكەنى كورىنەدى. ارتىنان كەلە جاتقان كولىك جۇرگىزۋشىسى تەجەپ ۇلگەرمەي، ايەلدى باسىپ وتكەن.
زارداپ شەككەن ايەل ءتىرى قالدى. ول قالا اۋرۋحاناسىنا جەتكىزىلدى. دارىگەرلەر ونىڭ جاعدايىن ورتاشا اۋىر دەپ باعالاپ وتىر، زەينەتكەر ەسىن بىلەدى.
قوستاناي وبلىستىق پوليسيا دەپارتامەنتىنىڭ باسپا ءسوز قىزمەتى جول اپاتى بويىنشا اكىمشىلىك ءىس قوزعالعانىن مالىمدەدى. جينالعان ماتەريالدار سوتقا جولدانباق. ال تاكسي جۇرگىزۋشىسى جولاۋشى تاسىمالداۋ ەرەجەسىن بۇزعانى ءۇشىن جاۋاپقا تارتىلدى.