سۇيىتىلعان گازدىڭ قۇنى وتكەن جىلدىڭ سوڭىنداعى باعا دەڭگەيىنەن اسپاۋى ءتيىس. ياعني كوگىلدىر وتىننىڭ قۇنى 180 كۇن بويى رەتتەلەدى، دەپ حابارلايدى almaty-akshamy.kz «حابار 24»-كە سىلتەمە جاساپ.
ال سۇيىتىلعان گازدى ەلەكتروندى ساۋدا الاڭدارى مەن بيرجالار ارقىلى وتكىزۋگە تولىق كوشۋ ءبىر جىلعا شەگەرىلەدى. باس پروكۋراتۋرا مەن باسەكەلەستىكتى قورعاۋ اگەنتتىگى باعالىق ءسوز بايلاسۋ مەن وزگە دە باسەكەلەستىككە قارسى ىس-ارەكەتتەرگە قاتىستى تەرگەۋ جۇرگىزىپ، 20 كۇن ىشىندە ەسەپ بەرۋگە ءتيىس. مەملەكەت باسشىسى قاسىم-جومارت توقايەۆ بۇگىن ەلدەگى الەۋمەتتىك-ەكونوميكالىق جاعدايعا قاتىستى كەڭەستە وسىنداي تاپسىرما بەردى.
پرەزيدەنت ەلدىڭ ساياسي، الەۋمەتتىك جانە ەكونوميكالىق قۇرىلىسى وزگەرمەيتىنىن ايتتى. ياعني ۋنيتارلىق، زاڭ ۇستەمدىگى، جەكە مەنشىك قۇقىعىن قۇرمەتتەۋ جانە نارىقتىق ەكونوميكا مەملەكەتتىك ساياساتىمىزدىڭ باستى قاعيداتتارى بولىپ قالا بەرەدى.