ەلىمىزدىڭ ءبىرقاتار ايماقتارىندا زاڭسىز اكسيالار ءوتتى دەپ حابارلايدى almaty-akshamy.kz ت ق ر ءىىم سىلتەمە جاساپ.
جەرگىلىكتى اتقارۋشى ورگاندار مەن پروكۋراتۋرانىڭ ەسكەرتۋلەرىنە قاراماستان ازاماتتار ارانداتۋشىلىق شاقىرۋلارعا ەرىپ، تۇراقتىلىققا جانە حالىقتىڭ قاۋىپسىزدىگىنە ءقاۋىپ توندىرەتىن زاڭسىز ارەكەتتەر جاساي باستادى.
سونىمەن قاتار، ازاماتتاردىڭ جەكەلەگەن توپتارى جولداردى جاۋىپ، قوعامدىق ءتارتىپتى، ازاماتتاردىڭ تىنىشتىعىن جانە ەلدى مەكەندەردىڭ تىرشىلىگىن قامتاماسىز ەتۋ جۇيەسىن بۇزىپ، كولىك قوزعالىسىنا توسقاۋىل قويدى. بۇعان قوسا قۇقىق قورعاۋ جانە قۇقىقتىق ءتارتىپ پەن قاۋىپسىزدىكتى قامتاماسىز ەتەتىن باسقا دا ورگانداردىڭ قىزمەتكەرلەرىنە شابۋىل جاسالدى.
الماتى، شىمكەنت جانە تاراز قالالارىندا اكىمدىكتەرگە شابۋىل جاساپ، اينەكتەرى مەن ەسىكتەرىن سىندىردى، باسقا دا ماتەريالدىق زالال كەلتىرىلدى. تاستاردى، تاياقتاردى، گاز، بۇرىش باللوندارىن جانە جانعىش قوسپاسى بار بوتەلكەلەردى پايدالانۋ جاعدايلارى ورىن الدى.
قوعامدىق قاۋىپسىزدىكتى قامتاماسىز ەتۋ ماقساتىندا پوليسيا قوعامدىق ءتارتىپتى بۇزۋدىڭ جولىن كەسۋ جانە ءتارتىپ بۇزۋشىلاردى ۇستاۋ بويىنشا زاڭدا كوزدەلگەن شارالاردى قابىلدادى.
زاڭسىز ارەكەتتەردىڭ سالدارىنان ىشكى ىستەر ورگاندارىنىڭ 95 قىزمەتكەرىنە دەنە جاراقاتتارى كەلتىرىلگەن. 37 قىزمەتتىك اۆتوكولىك بۇلىنگەن. بيلىك وكىلدەرىنە قارسى كۇ قولدانۋ، بۇزاقىلىق، مەملەكەتتىك ورگانداردىڭ عيماراتتارىنا شابۋىل جاساۋدىڭ 13 فاكتىسى بويىنشا سوتقا دەيىنگى تەرگەۋ باستالدى.
قوعامدىق ءتارتىپتى بۇزعانى ءۇشىن 200-دەن استام ادام ۇستالدى. ىشكى ىستەر ورگاندارى حالىقتىڭ قاۋىپسىزدىگى مەن تىنىشتىعىن قامتاماسىز ەتۋ جونىندە بارلىق قاجەتتى شارالاردى قابىلداۋدا.