الەۋمەتتىك پروبلەمانى، تۇرمىستىق جاعدايدى قازاق حالقى ءبىرتۇتاس بولىپ جەڭۋى كەرەك. مۇنداي پىكىردى اقىن، مەملەكەتتىك سىيلىقتىڭ لاۋرەاتى نۇرلان ورازالين ءبىلدىردى، دەپ حابارلايدى almaty-akshamy.kz قازاقپاراتقا سىلتەمە جاساپ.
اقىننىڭ ايتۋىنشا، ءقازىر كوزگە كورىنبەيتىن، قولعا ۇستالمايتىن، قاتەرلى ءبىر قۇبىلىس بار. ونىڭ قايدان كەلىپ، كىمنىڭ ايتىپ جاتقانى بەلگىسىز.
«ءبىز وتە كۇردەلى، قيىن كەزەڭدە ءومىر ءسۇرىپ جاتقان ۇرپاقپىز. ەگەر ءبىز كىشكەنتاي قاتە جىبەرەتىن بولساق، ول ەرتەڭگى ۇرپاقتىڭ الدىنان ۇلكەن جاعداي بولىپ شىعادى. ۇلت بولشاعىنا ءقاۋىپتى بولماق. ءقازىر كوزگە كورىنبەيتىن، قولعا ۇستالمايتىن، قاتەرلى ءبىر قۇبىلىس بار. ونىڭ قايدان كەلىپ، كىمنىڭ ايتىپ جاتقانى بەلگىسىز. دەموكراتيالىق قۇندىلىقتى ۇستاي الساق جاقسى، ەگەر ۇستاي الماساق ول ءبىزدىڭ ءبىرىنشى جاۋىمىزعا اينالادى»،- دەيدى ول.
نۇرلان ورازالين الەۋمەتتىك پروبلەمانىڭ بار ەكەنىن ايتتى.
«ارينە، الەۋمەتتىك قيىندىق، تۇرمىستىق پروبلەما بار. ول قيىندىقتى قازاق مەملەكەتى ءوزى ءبىرتۇتاس بولىپ جەڭۋ كەرەك. ونى بىزگە سىرتتان كەلىپ ەشكىم رەتتەپ بەرمەيدى. ءار ۇلت ءوز ماسەلەسىن ءوزى شەشەدى. الەۋمەتتىك پروبلەما دەموكراتيالىق جولمەن، ديالوگپەن شەشىلگەن ەدى. الايدا، الاشتىڭ باس قالاسى الماتىدا جۇگەنسىزدىك، تارتىپسىزدىك ورىن الدى. بۇل ۇلتتى ازعىرۋ دەپ ەسەپتەيمىن. مەن بۇگىنگى جاستارعا ايتارىم ءبارى اقىلمەن، پاراساتتىلىقپەن شەشىلۋى كەرەك. اتا- بابامىز اماناتتاپ كەتكەن بەرەكەنى ساقتاۋىمىز قاجەت»،-دەدى نۇرلان ورازالين.
زيالى قاۋىم وكىلى، جاستاردى سابىرلىققا شاقىردى.
«جاستار بەسىكتە جاتقان بالاسىن، ۇيدەگى قازىنالى قارياسىن ويلاۋى كەرەك، حالقىنىڭ بۇتىندىگىن، ەلىنىڭ تىنىشتىعىن، ۇلت بولشاعىن، مەملەكەتتىڭ ەرتەڭىن ويلاۋى ءتيىس. مۇنداي جولمەن ەشقانداي ماسەلە شەشىلمەيدى. مەن جاستاردى سابىرلىققا شاقىرامىن»،- دەدى ول.
سونىمەن قاتار، ول بيلىك ماسەلەنى بەيبىت جولمەن شەشۋگە تىرىسىپ جاتقانىن تىلگە تيەك ەتتى.
«بيلىك ماسەلەنى شەشۋ ءۇشىن بارلىق جاعدايدى قاراپ، شەشۋگە تىرىسىپ جاتىر. مەملەكەت باسشىسى حالىقتى بەرەكەگە، اقىلعا شاقىردى. پرەزيدەنت ۇندەۋىنە قۇلاق اسۋىمىز كەرەك»،- دەدى نۇرلان ورازالين.