سۋدىڭ «قارا نارىعىن» جويۋ ماقساتىندا سۋ رەسۋرستارى جانە يرريگاسيا مينيسترلىگى سۋ سالاسىنداعى قۇقىق بۇزۋشىلىقتار ءۇشىن جاۋاپكەرشىلىكتى كۇشەيتۋگە نيەتتى.
اتاپ ايتقاندا، جاڭا سۋ كودەكسىندە سۋدى پايدالانۋ مەن قورعاۋعا مەملەكەتتىك باقىلاۋ مەن قاداعالاۋدى كۇشەيتۋگە باعىتتالعان ماڭىزدى وزگەرتۋلەر قاراستىرىلىپ وتىر، دەپ حابارلايدى Almaty-akshamy.kz.
جاڭا سۋ كودەكسىندە ۋاكىلەتتى ۆەدومستۆو مەن باسسەيندىك ينسپەكسيالارعا قاداعالاۋ فۋنكسيالارى بەرىلەدى. قازىرگى ۋاقىتتا باسسەيندىك ينسپەكسيالار كاسىپكەرلىك كودەكس اياسىندا تەكسەرىس جۇرگىزەدى. الايدا، جوسپارلاۋ، تىركەۋ جانە حابارلاۋ پروسەسى ۇزاققا سوزىلۋىنا بايلانىستى قۇقىق بۇزۋشىلار ءجيى جازادان قۇتىلىپ كەتەدى.
بۇدان بولەك، قولدانىستاعى كاسىپكەرلىك كودەكسكە تولىقتىرۋلار ەنگىزۋ ۇسىنىلىپ وتىر. بۇل وزگەرىستەر باسسەيندىك ينسپەكسيالار مەن مەملەكەتتىك سۋ ينسپەكتورلارىنىڭ فۋنكسيالارىن كەڭەيتەدى، مەملەكەتتىك باقىلاۋ مەن قاداعالاۋ نىساندارىن وزگەرتەدى، سونداي-اق جەدەل دەن قويۋ شارالارىن قابىلداۋدىڭ جاڭا قۇرالدارىن، شارتتارى مەن نەگىزدەرىن ەنگىزەدى.
«بۇل ءبىزدىڭ نەگىزگى ۇستانىم. سۋدىڭ «قارا نارىعىن» جويۋ جانە باسقا دا قۇقىق بۇزۋشىلىقتاردىڭ الدىن الۋ ءۇشىن ءبىز مەملەكەتتىك باقىلاۋدى كۇشەيتەمىز. ەشكىم جاۋاپكەرشىلىكتەن قۇتىلمايدى. ءبىز ۇسىنعان جاڭا نورمالار مەن ەرەجەلەر قۇقىق بۇزۋشىلىقتار سانىن ەداۋىر ازايتۋعا جانە ەلىمىزدىڭ سۋ رەسۋرستارىنا تۇراقتى باقىلاۋدى قامتاماسىز ەتۋگە مۇمكىندىك بەرەدى»، - دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.