پرەمەر-مينيستر ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا سۋ رەسۋرستارىن ءتيىمدى پايدالانۋ ماسەلەلەرى قارالدى.
ەكولوگيا، گەولوگيا جانە تابيعي رەسۋرستار مينيسترلىگىنىڭ دەرەكتەرىنە ساي، بارلىق سۋ توعانىنان ەلدى تۇراقتى سۋارۋعا شامامەن 11،6 تەكشە كيلومەتر سۋ جۇمسالادى، دەپ حابارلايدى Almaty-akshamy.kz
ونىڭ 11،3 تەكشە كيلومەترى نەمەسە 97%-ى وڭتۇستىكتەگى ءتورت وبلىسقا تيەسىلى. ولار – 1،28 ملن گەكتار سۋارمالى الاڭى بار، ياعني ەل بويىنشا بارلىق سۋارمالى الاڭنىڭ 80%-ىن قۇرايتىن الماتى، جامبىل، تۇركىستان جانە قىزىلوردا وبلىستارى.
"سوڭعى جىلدارى سۋ تاپشىلىعى ەلدىڭ وڭتۇستىك وڭىرلەرىندە بىلىنۋدە. وسى وڭىرلەردە ۆەگەتاسيالىق كەزەڭنىڭ تۇراقتى ءوتۋىن قامتاماسىز ەتۋ ءۇشىن بىلتىرعى قاراشادان باستاپ الداعى ۆەگەتاسيالىق كەزەڭگە دايىندىق جۇمىستارى باستالدى"، – دەدى س. برەكەشيەۆ.
تالقىلاۋ قورىتىندىسى بويىنشا، ءاليحان سمايىلوۆ ۆەگەتاسيالىق كەزەڭنىڭ جاقسى ءوتۋى الداعى ماۋسىمداعى ەگىستىڭ ءونىمدى بولۋىنا عانا ەمەس، تۇپتەپ كەلگەندە، ەلىمىزدىڭ ازىق-تۇلىك قاۋىپسىزدىگىنە تىكەلەي بايلانىستى ەكەنىن اتاپ ءوتتى.
ول قازاقستانداعى سەگىز سۋ شارۋاشىلىعى باسسەينىنىڭ جەتەۋى باستاۋىن ترانسشەكارالىق وزەندەردەن الاتىنىن اتاپ ءوتتى. وزەن سۋلارىنىڭ تەڭ جارتىسىنا جۋىعى بىزگە سىرتتان كەلەدى.
بۇل رەتتە، ساراپشىلاردىڭ بولجاۋىنا ساي، 2040 جىلعا قاراي قازاقستاندا سۋدى تۇتىنۋ كولەمى 56%-عا وسەدى، ال سۋ تاپشىلىعى جىلىنا 12 تەكشە كيلومەترگە دەيىن جەتۋى مۇمكىن. ونىڭ ۇستىنە قازاقستانداعى وزەندەردىڭ تارتىلىپ بارا جاتقانى بىلىنەدى. مۇنىڭ بارلىعى ەلىمىزدىڭ وڭتۇستىك وڭىرلەرىنىنىڭ سۋ تاپشىلىعىنان زارداپ شەگۋىنە اكەلەدى.
وسىعان بايلانىستى ۇكىمەت باسشىسى سۋدى ءتيىمدى پايدالانۋدىڭ وتە وزەكتى ماسەلە بولىپ وتىرعانىن ايتتى.
ماسەلەن، اۋىل شارۋاشىلىعىنا ارنالعان سۋدىڭ نەبارى 60%-ى عانا ەگىس القاپتارىنا دەيىن جەتەدى. قالعان بولىگى ينفراقۇرىلىمنىڭ ناشارلىعىنان دالاعا كەتەدى. سوندىقتان كانالدار مەن سۋ قويمالارىن جوندەپ، سۋ رەسۋرستارىن باسقارۋدى اۆتوماتتاندىرۋ قاجەت.
"اكىمدىكتەر بۇل ماسەلەنى ەرەكشە باقىلاۋدا ۇستاپ، سۋ شارۋاشىلىعى وبەكتىلەرىن سيفرلاندىرۋ جانە اۆتوماتتاندىرۋ جونىندەگى جول كارتالارىن ۋاقىتىلى ىسكە اسىرۋدى قامتاماسىز ەتۋى ءتيىس. كانالدار مەن سۋ قويمالارىنىڭ مەنشىك يەلەرى ءوز مىندەتتەرىن ناقتى ورىندايتىن بولسا، جوندەۋ جۇمىستارىن جانە سۋ رەسۋرستارىن باسقارۋدى جەتىلدىرۋگە مەملەكەتتىك قولداۋ شارالارىمەن ىنتالاندىرۋ ماڭىزدى"، – دەدى ءاليحان سمايىلوۆ.
سونىمەن قاتار ۇكىمەت باسشىسى سۋارمالى سۋدى ءتيىمدى ءبولۋ كەرەكتىگىنە نازار اۋداردى. اكىمدىكتەر سۋدى كوپ قاجەت ەتەتىن داقىل القاپتارىن قىسقارتۋ ءۇشىن، فەرمەرلەر اراسىندا ۇنەمى ءتۇسىندىرۋ جۇمىستارىن جۇرگىزۋى ءتيىس.