بيىل قازاقستان حالقىنىڭ 58 پايىزى گازبەن قامتىلادى.
2021 جىلى قازاقستان حالقىنىڭ 57 پايىزى گازبەن قامتىلدى. بۇل تۋرالى ق ر ەنەرگەتيكا ءمينيسترى بولات اقشولاقوۆ ايتىپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2021 جىلدىڭ قورىتىندىسى بويىنشا، ەلىمىزدى گازداندىرۋ دەڭگەيى حالىقتىڭ جالپى سانىنىڭ 57،67%-ىن قۇرادى نەمەسە 11 ملن ادام گازعا قول جەتكىزدى. جالپى، ەلدى گازداندىرۋ 2015-2030 جىلدارعا ارنالعان باس جوسپارعا سايكەس جۇزەگە اسىپ جاتىر»، - دەدى بولات اقشولاقوۆ ۇكىمەت وتىرىسىندا.
سوڭعى جىلدارى ىشكى گاز تۇتىنۋدىڭ كۇرت وسۋىنە جانە ەلدى ودان ءارى ۇزدىكسىز گازداندىرۋ ءۇشىن گاز تاسىمالداۋ جۇيەسىن جاڭعىرتۋ قاجەتتىلىگىنە بايلانىستى مينيسترلىك «قازاقگازبەن» بىرلەسىپ «گازداندىرۋدىڭ باس سحەماسىن» جۇزەگە اسىرىپ جاتىر. باس سحەمانى ىسكە اسىرۋ بيۋدجەت قاراجاتى، «قازاقگاز» جانە ق ر زاڭناماسىندا تىيىم سالىنباعان وزگە دە كوزدەر ارقىلى جۇرگىزىلىپ جاتىر.
«بيىل ەلدى گازداندىرۋدى دامىتۋعا مينيسترلىكتىڭ رەسپۋبليكالىق بيۋدجەتتەن 45،8 ملرل تەڭگە ءبولىندى. سونداي-اق 2022 جىلعا ارنالعان رەسپۋبليكالىق بيۋدجەتتى ناقتىلاۋ شەڭبەرىندە قوسىمشا 50،1 ملرد تەڭگە قولداۋ تاپتى. ناتيجەسىندە 133 جوبانى ىسكە اسىرۋعا 96 ملرد تەڭگە قاراستىرىلىپ، بۇل 146 مىڭ ادامدى نەمەسە 93 ەلدى مەكەندى گازبەن قامتاماسىز ەتۋگە مۇمكىندىك بەرەدى. 2022 جىلدىڭ قورىتىندىسى بويىنشا جوسپارلانعان گازداندىرۋ دەڭگەيى – 58،43%»، - دەدى ەنەرگەتيكا ءمينيسترى.