ءار ءتۇرلى ينفەكسيالاردى جۇقتىرۋ ءقاۋپى بار.
ويتكەنى، ونداعى سۋدىڭ قۇرامىنا دەنساۋلىققا ايتارلىقتاي زيان كەلتىرەتىن ءتۇرلى حيميالىق زاتتار قوسىلادى، دەپ حابارلايدى Almaty-akshamy.kz
جازدا بالالاردىڭ سۇيىكتى ويىن-ساۋىقتارىنىڭ ءبىرى – سۋبۇرقاقتاردا شومىلۋ. فونتاندى شومىلۋعا ارنالعان ورىن رەتىندە ەرەسەكتەر دە پايدالاناتىن كەزدەر بولادى. مۇنداي زيانسىز ەرمەك وتە ءقاۋىپتى. ماسەلە مىنادا، قالالىق سۋبۇرقاقتارداعى سۋ شومىلۋعا ارنالماعان. ونىڭ قۇرامىنا دەنساۋلىققا ايتارلىقتاي زيان كەلتىرەتىن ءتۇرلى حيميالىق زاتتار قوسىلادى. ءارتۇرلى ينفەكسيالاردى جۇقتىرۋ ءقاۋپى بار. ءسىز تەك جۇقتىرىپ قانا قويماي، كەيىننەن اۋرۋدى تاراتۋىڭىز دا ىقتيمال. فونتاندا شومىلۋ ءجىتى ىشەك ينفەكسياسىنا، رەسپيراتورلىق ينفەكسياعا اكەلۋى مۇمكىن، ال نەگىزگى ءقاۋىپ – ەنتەروۆيرۋستىق، روتاۆيرۋستىق ينفەكسيالار، سونداي-اق ا ۆيرۋستىق گەپاتيتى.
جىل سايىن جازعى كەزەڭدە، مامىردان قىركۇيەككە دەيىنگى ايلاردا، ۆيرۋستىق سانيتارلىق-حيميالىق جانە باكتەريولوگيالىق كورسەتكىشتەرگە سۋ سىنامالارىن الا وتىرىپ، سۋبۇرقاق كەشەندەرىنىڭ سۋ ساپاسىنا مونيتورينگ جۇرگىزىلەدى.
بۇگىنگى تاڭدا ەلىمىزدە 643 سۋبۇرقاق جۇمىس ىستەيدى، ونىڭ 318ء-ى (49،4%) زەرتحانالىق باقىلاۋمەن قامتىلعان. اعىمداعى جىلعى وتكەن كەزەڭدە ۆيرۋسولوگيالىق كورسەتكىشتەرگە 197 سۋ سىناماسى، باكتەريولوگيالىق كورسەتكىشتەرگە 76 سۋ سىناماسى جانە سانيتاريالىق-حيميالىق كورسەتكىشتەرگە 47 سۋ سىناماسى الىندى. سايكەس كەلمەيتىن سىنامالاردىڭ نەگىزگى كولەمى (9،1%) ۆيرۋسولوگيالىق كورسەتكىشتەر بويىنشا انىقتالعان.
زەرتتەۋ ناتيجەلەرى بويىنشا رۇقسات ەتىلگەن ماندەردەن اۋىتقۋلار قوستاناي جانە شىعىس قازاقستان وبلىستارىندا، سونداي-اق نۇر-سۇلتان قالاسىندا انىقتالدى. قالعان وڭىرلەردە زەرتتەلەتىن سۋ سىنامالارىنىڭ ناتيجەلەرى نورمالاناتىن كورسەتكىشتەر شەگىندە. سۋ مونيتورينگىنىڭ ناتيجەلەرى بويىنشا شارالار قابىلداۋ ءۇشىن جەرگىلىكتى اتقارۋشى ورگاندارعا، اۋماقتىق پوليسيا دەپارتامەنتتەرىنە، سونداي-اق بۇرقاقتارعا قىزمەت كورسەتەتىن ۇيىمدارعا ۇسىنىمحاتتار جولداندى.
«قۇرمەتتى ازاماتتار! ساقتىق شارالارىن ساقتاۋعا، سۋبۇرقاقتاردا شومىلۋدان اۋلاق بولۋعا، ءوزىڭىزدى جانە جاقىندارىڭىزدى ينفەكسيا قاۋپىنە ۇشىراتپاۋعا كەڭەس بەرەمىز. بالالارىڭىزعا سۋبۇرقاقتاردا شومىلۋدىڭ قاۋىپتىلىگى تۋرالى ءتۇسىندىرىڭىز»، - دەگەن اقپارات تاراتتى سانيتارلىق-ەپيدەميولوگيالىق باقىلاۋ كوميتەتى.