سۋارۋ ماۋسىمىنىڭ قالىپتى ءوتۋىن قامتاماسىز ەتۋ ءۇشىن «قازسۋشار» كاسىپورنى ەلىمىزدىڭ 7 وڭىرىندە جالپى ۇزىندىعى 2011 شاقىرىم بولاتىن كانالداردى مەحانيكالىق جولمەن تازارتىپ جاتىر.
بۇل جۇمىستار الماتى، باتىس قازاقستان، شىعىس قازاقستان، جامبىل، قىزىلوردا، تۇركىستان جانە جەتىسۋ وبلىستارىندا جۇرگىزىلۋدە. بۇگىنگى تاڭدا 300 شاقىرىمنان استام كانال تازارتىلدى، دەپ حابارلايدى aqshamnews.kz.
ق ر سۋ رەسۋرستارى جانە يرريگاسيا مينيسترلىگىنىڭ مالىمەتىنشە، كانالداردى تازارتۋ ولاردىڭ سۋ وتكىزۋ مۇمكىندىگىن جاقسارتىپ، ديقانداردى سۋارمالى سۋمەن تۇراقتى قامتاماسىز ەتۋ ءۇشىن قاجەت. بيىل «قازسۋشار» فيليالدارى ديقاندارمەن 12،7 ملرد تەكشە مەتر سۋ جەتكىزۋ ءۇشىن 27،8 مىڭنان استام شارت جاساسۋدى جوسپارلاپ وتىر. قازىرگى تاڭدا 11 700 شارت جاسالدى. بىلتىر شارۋا قوجالىقتارىمەن 23 830 شارت جاسالعان.
«بىلتىر مينيسترلىك قازاقستاننىڭ وڭتۇستىك وڭىرىندەگى ديقانداردى سۋارمالى سۋمەن تولىق قامتاماسىز ەتتى. بيىل دا ۆەدومستۆو ورتالىق ازيا ەلدەرىمەن كەلىسسوزدەر جۇرگىزدى. ونىڭ ناتيجەسى بويىنشا 2025 جىلعى سۋارۋ ماۋسىمىندا سىرداريا وزەنى ارقىلى ەلىمىزگە 3،7 ملرد تەكشە مەتر سۋ كەلەدى. شۋ جانە تالاس وزەندەرىمەن 600 ملن تەكشە مەتردەن استام سۋ جەتكىزىلەدى»، – دەدى سۋ رەسۋرستارى جانە يرريگاسيا ۆيسە-مينيسترى ەربولات يبرايحانوۆ.