ادامزات وركەنيەتىنىڭ سان عاسىرلىق تاريحى - بەيبىتشىلىك پەن تاتۋلىققا نەگىزدەلمەگەن قوعامنىڭ بەرەكەسى قاشاتىنىن الدەقاشان دالەلدەگەن. ءتۇرلى مادەنيەت پەن ءدىننىڭ، ءداستۇر مەن سالتتىڭ تۇيىسكەن جەرىندە ورتاق قۇندىلىقتاردى ساقتاۋ - كەز كەلگەن مەملەكەتتىڭ تۇراقتى دامۋى ءۇشىن باستى شارت.
وسى تۇرعىدا قازاقستان – بۇكىل الەمگە ۇلگى بولا الاتىن دارا مەملەكەت. سەبەبى بۇل جەردە سان ءتۇرلى ەتنوس وكىلدەرى ءبىر شاڭىراقتىڭ استىندا جاراسىمدى عۇمىر كەشىپ كەلەدى. ولار ءبىر عانا وتاننىڭ يگىلىگى ءۇشىن ەڭبەك ەتىپ، ەلدىك مۇددە جولىندا جۇمىلعان.
كۇنتىزبەدەگى 1 مامىر – جاي عانا مەيرام ەمەس. بۇل – كوكىرەگى وياۋ، جۇرەگى ەلگە تولى ءاربىر ازامات ءۇشىن ەرەكشە رۋحاني ءمانى بار تاعىلىمدى كۇن. ەلىمىزدەگى رۋحاني تۇتاستىقتىڭ، تاريحي ساباقتاستىقتىڭ، مادەني ارتۇرلىلىكپەن بايىتىلعان ءبىرتۇتاس قوعامنىڭ كورىنىسى – تاۋەلسىز ەلدىڭ كەمەل بولمىسىن تانىتاتىن تاريحي بەلەس. مەملەكەت باسشىسى قاسىم-جومارت كەمەل ۇلى توقايەۆ ءوزىنىڭ ءبىرقاتار سوزدەرىندە:
«قوعامداعى ەڭ باستى بايلىعىمىز – ىنتىماعى جاراسقان حالىق. تۇراقتىلىق پەن بەيبىت ءومىر – ەشقانداي بايلىقپەن ولشەنبەيتىن يگىلىك»، – دەپ اتاپ كورسەتكەن بولاتىن. بۇل پايىم – كەلەشەك ۇرپاق ءۇشىن باعىت-باعدار بولا الاتىن تۇعىرلى تۇجىرىم. ۇلتتىڭ وركەندەۋى مەن مەملەكەتتىڭ دامۋى ەڭ الدىمەن ەل ىشىندەگى تاتۋلىق پەن بىرلىكتىڭ بەرىكتىگىنە بايلانىستى. كەڭ ساحارانى مەكەندەگەن قازاق جۇرتى تاريحتىڭ تالاي تاۋقىمەتىن باسىنان كەشىرسە دە، ەشقاشان بوتەندى جاتسىنعان ەمەس. قۋعىن-سۇرگىن زاماندارىندا جەر اۋىپ كەلگەن حالىقتارعا قول ۇشىن سوزىپ، باۋىرىنا باسقانى - بۇكىل ۇلتتىڭ ادامگەرشىلىك قاسيەتىنىڭ بيىك ۇلگىسى.
ەلىمىزدە ءتاتۋ-تاتتى ءومىر ءسۇرىپ جاتىرعان جۇزدەن استام ۇلت پەن ۇلىس وكىلدەرىنىڭ ءارقايسىسى ءوزىنىڭ ءتىلىن، ءدىلىن، ءداستۇرىن ساقتاپ قانا قويماي، قازاقستاننىڭ كەمەل كەلەشەگىنە ۇلەس قوسىپ كەلەدى. مىنەكي، وسى بىرەگەي ءۇردىس – قازاقستان حالقى اسسامبلەياسى ارقىلى جۇيەلەنىپ، جاڭا دەڭگەيدە، ەتنوستار اراسىنداعى بايلانىستى نىعايتاتىن، ەل ىشىندەگى بىرەگەيلىكتى قالىپتاستىراتىن كۇشتى قۇرال.
2024 جىلعى سەسسيادا پرەزيدەنتىمىز:
«اسسامبلەيا – ەل بىرلىگىن نىعايتۋدىڭ قۋاتتى تەتىگى. ول مەملەكەتتىك ساياساتتىڭ اجىراماس بولىگى بولىپ قالا بەرەدى»، – دەپ ونىڭ ماڭىزىن ايرىقشا اتاپ ءوتتى.
بۇگىنگى قوعام – كوپمادەنيەتتى، كوپتىلدى ورتا. ورتاق تاعدىردىڭ يەلەرى رەتىندە بارشا قازاقستاندىقتاردىڭ جاۋاپكەرشىلىگى زور. سەبەبى كەز كەلگەن ەلدىڭ كەلەشەگى - ۇرپاقتىڭ بويىنا سىڭىرىلگەن قۇندىلىقتارمەن ولشەنەدى.
بىرلىگى جاراسقان ەل – كەز كەلگەن تاريحي سىناقتى جەڭىپ شىعا الادى. ياعني، مىزعىماس ىنتىماق پەن حالىقتار اراسىنداعى تاتۋلىق – ءبىزدىڭ ەڭ ۇلكەن جەتىستىگىمىز. وسى يگىلىكتى ساقتاۋ، ۇلتجاندىلىق تانىتۋ – ءاربىر ازاماتتىڭ پارىزى.
ەندەشە، الەمگە ۇلگى بولارلىق تاتۋلىقتىڭ تۋىن بيىكتە جەلبىرەتىپ وتىرعان ەلدىڭ بولاشاعى دا جارقىن.
سوندىقتان بۇل مەرەكە – تەك كۇنتىزبەدەگى اتاۋلى كۇن ەمەس، جۇرەك تۇكپىرىندەگى ماقتانىش، بولاشاققا باعىتتالعان سەنىم، بيىك ارماننىڭ كورىنىسى.