ەلىمىزدىڭ وڭتۇستىگىندەگى ەگىس القاپتارىندا ماجارستاندىق تەحنولوگيا سىناقتان وتكىزىلەدى. سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ اۋىل شارۋاشىلىعى القاپتارىنا ارنالعان پرەپاراتتار ازىرلەيتىن ماجارستاندىق Water&Soil كومپانياسىنىڭ وكىلدەرىمەن كەزدەستى.
تاراپتار كومپانيانىڭ جاڭا ازىرلەمەلەرىن قازاقستاندا قولدانۋ ماسەلەسىن تالقىلادى.
اتاپ ايتقاندا، Water&Soil توپىراقتاعى ىلعالدى ساقتاۋ ءۇشىن ورگانيكالىق پرەپارات ازىرلەيدى. كومپانيا وكىلدەرىنىڭ ايتۋىنشا، پرەپارات سۋارۋ كولەمىن 40%-عا ازايتۋعا مۇمكىندىك بەرەدى جانە وسىمدىكتەردى قۇرعاق كەزەڭدەردە دە ىلعالمەن قامتاماسىز ەتەدى.
كەزدەسۋ قورىتىندىسى بويىنشا تاراپتار قازاق سۋ شارۋاشىلىعى عىلىمي-زەرتتەۋ ينستيتۋتىنىڭ قاتىسۋىمەن ەلىمىزدىڭ وڭتۇستىك وڭىرلەرىندەگى سۋارۋ القاپتارىندا پرەپاراتتى سىناقتان وتكىزۋگە كەلىستى. سونداي-اق، ماجارستاننان كەلگەن قوناقتار قازاقستاندا ءوز ونىمدەرىن شىعاراتىن زاۋىت اشۋعا نيەت ءبىلدىردى.
«قازاقستاننىڭ وڭتۇستىگىندە ونىمدىلىكتى تومەندەتپەي، سۋارمالى سۋدى ۇنەمدەۋ ءۇشىن وزىق سۋ ۇنەمدەۋ تەحنولوگيالارىن ەنگىزۋ قاجەت. وسى ماقساتتا جەتەكشى شەتەلدىك كومپانيالارمەن كەلىسسوزدەر جۇرگىزىلۋدە. ەگەر سىناقتار ءساتتى وتسە، وتاندىق شارۋالار تاراپىنان بۇل ازىرلەمەگە ۇلكەن سۇرانىس بولادى»، - دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.