بۇگىندە قوعامدا مامس-كە، ياعني مىندەتتى الەۋمەتتىك مەديسينالىق ساقتاندىرۋ جۇيەسىنە كوڭىل تولماۋشىلىق باسىم. بۇل جۇيەنى مەملەكەت باسشىسى دا سىنعا الىپ، ناقتى مىندەتتەر جۇكتەگەن بولاتىن. ءقازىر جاڭادان تاعايىندالعان دەنساۋلىق ساقتاۋ ءمينيسترى اقمارال ءالنازاروۆا دا «جىرى» بىتپەگەن ءمامس جۇيەسىنە جان-جاقتى تالداۋ جۇرگىزىپ، ونىڭ تيىمدىلىگىن ارتتىرۋعا تىرىسامىن دەپ وتىر.
وسى ورايدا بىزگە تۇرعىندار تاراپىنان ەڭ ءجيى قويىلاتىن ساۋالداردىڭ ءبىرى – «مەن مامس-كە اي سايىن جارنا اۋدارامىن. ءبىراق دارىگەرگە اي سايىن قارالىپ جاتقان جوقپىن. سوندا ول اقشا قايدا كەتىپ جاتىر؟».
بۇل سۇراقتى ءبىز سالا مامانى، الەۋمەتتىك مەديسينالىق ساقتاندىرۋ قورىنىڭ الماتى فيليالى ديرەكتورى تىلەۋحان ابىلدايەۆقا قويعان بولاتىنبىز.
– قازاقستان ساقتاندىرۋدىڭ جيناقتاۋ ەمەس، ورتاق جاۋاپكەرشىلىك پرينسيپىنە نەگىزدەلگەن مودەلىن تاڭداپ الدى. سەبەبى، تولەنەتىن جارنالاردىڭ مولشەرى كوپ ەمەس. سوندىقتان ءبىر ادامنىڭ جيناقتاعان اقشاسى مەديسينالىق قىزمەت اقىسىن تولەۋگە دە جەتپەيدى. قاراپايىم مىسال: اي سايىن 3500 تەڭگە تولەپ ساقتاندىرىلاتىن ءوزىن-وزى جۇمىسپەن قامتىعان ازاماتتار ءبىر جىلدا 42 000 تەڭگە تولەيدى. ەگەر ءبىز ءار ادامدى ءوز قاراجاتىنا عانا ەمدەيتىن بولساق، ونىڭ جيناعان اقشاسى ەشتەڭەگە جەتپەس ەدى. مىسالى، پنيەۆمونيانى ەمدەۋگە كەتەتىن شىعىن 100 مىڭ تەڭگە، بوساندىرۋ 100 مىڭ تەڭگە، ال ورتوكورونارلىق شۋنتتاۋ 3-4 ملن تەڭگە تۇرادى. ەگەر بىزدە جيناقتاۋ جۇيەسى بولسا، ازاماتتار مەديسينالىق قىزمەت اقىسىن ءوزى جيناعان قاراجاتى ەسەبىنەن تولەي الماس ەدى. ال ورتاق جاۋاپكەرشىلىككە نەگىزدەلگەن ءمامس جۇيەسىندە قارجى ورتاق شوتتان الىنادى. تاعى ءبىر ەسكەرەتىن جايت، ءسىز دارىگەردىڭ كومەگىنە جۇگىنبەگەن بولساڭىز، تولەگەن اقشا جوعالىپ كەتتى دەگەندى بىلدىرمەيدى. ول ءسىزدىڭ جاقىندارىڭىزدى نەمەسە اۋرۋحانادا جاتقان وزگە دە وتانداستارىمىزدى ەمدەۋگە جۇمسالىپ جاتىر، – دەدى تىلەۋحان ابىلدايەۆ.