قاسىم-جومارت توقايەۆ د.سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتىنە بارىپ، جوعارى وقۋ ورنىنىڭ قىزمەتىمەن تانىستى جانە ونىڭ بازاسىندا قۇرىلعان «لۋ بان شەبەرحاناسى» وقۋ ورتالىعىن ارالاپ كوردى، دەپ حابارلايدى اlmaty-akshamy.kz.
پرەزيدەنتكە ءبىلىم وشاعىنىڭ عىلىمي-يننوۆاسيالىق ەكوجۇيەسى تۋرالى مالىمەت بەرىلدى. رەكتور ساۋلە راحمەتۋللينانىڭ ايتۋىنشا، بىلتىر ۋنيۆەرسيتەت بازاسىندا Smart engineering قۇزىرەتتەر ورتالىعى اشىلعان. ورتالىق ماشينا جاساۋ، تاۋ-كەن جانە مەتاللۋرگيا كەشەنى سالالارىنداعى يمپورتتى الماستىرۋشى تەحنولوگيالاردى دامىتۋدى كوزدەيدى.
مەملەكەت باسشىسىنا جاستاردىڭ يننوۆاسيالىق جوبالار جاساۋىنا مۇمكىندىك بەرەتىن مەديسينا باعىتىنداعى تەحنوپاركتىڭ نەگىزىن قالاۋ جوسپارى جونىندە باياندالدى. ءقازىردىڭ وزىندە ۋنيۆەرسيتەتتە ازىرلەنگەن 40-تان استام مەديسينالىق يمپلانتات ءتۇرى كلينيكالىق سىنىقتان وتكىزىلىپ جاتىر.
قازاق-نەمىس ۋنيۆەرسيتەتىمەن بىرلەسىپ، مەتاللۋرگيا، پايدالى قازبالاردى يگەرۋ باعىتىندا عىلىم جانە تەحنولوگيا ينستيتۋتىن اشۋ جوسپارلانعان.
«لۋ بان شەبەرحاناسى» «اۆتوموبيلدەردىڭ يننوۆاسيالىق كونسترۋكسياسى» جانە «اۆتوموبيلدەردىڭ SMART تەحنولوگياسى» سياقتى ەكى زەرتحانادان تۇرادى. ورتالىقتىڭ ءبىر ەرەكشەلىگى – مۇندا ستۋدەنتتەر پراكتيكالىق داعدىلاردى مەڭگەرىپ، اۆتوموبيل جۇيەلەرىنە سيمۋلياسيالىق سىناق جۇرگىزە الادى. سونداي-اق ورتالىقتا ەلەكتروموبيلدەر مەن گيبريدتى كولىكتەرگە تەحنيكالىق قىزمەت كورسەتۋ جانە دياگنوستيكا جاساۋ ءۇشىن جاڭا تەحنولوگيالاردى يگەرۋ ىسىنە ايرىقشا ءمان بەرىلەدى.
مەملەكەت باسشىسى جول قوزعالىسىن ينتەللەكتۋالدى تۇرعىدا ۇيىمداستىرۋعا ارنالعان SMART-ۇستەلمەن تانىستى.
پرەزيدەنتكە گيبريدتى اۆتوموبيلدەردى، ەلەكتروموبيلدەردى جانە ولاردى قۋاتتاۋ پرينسيپتەرىن ۇيرەنۋگە ارنالعان وقۋ ستەندتەرى كورسەتىلدى.
ەلىمىزدە «لۋ بان شەبەرحانالارىن» اشۋ باستاماسىن بىلتىر مامىر ايىندا سياندا وتكەن «ورتالىق ازيا – جۇڭگو» سامميتىندە پرەزيدەنت قاسىم-جومارت توقايەۆ پەن قحر ءتوراعاسى سي سزينپين كوتەرگەن بولاتىن.
ۋنيۆەرسيتەت ماقساتتارىنىڭ ءبىرى – وسى «لۋ بان شەبەرحاناسى» بازاسىندا وتاندىق اۆتوموبيل قۇراستىرۋ ونەركاسىبى ءۇشىن جوعارى بىلىكتى تەحنيكالىق جانە ينجەنەرلىك كادرلاردى دايارلاۋ.
ورتالىقتى ارالاپ كورگەن پرەزيدەنت ستۋدەنتتەرمەن اڭگىمەلەسىپ، ولارعا تابىس تىلەدى. سونداي-اق ەكونوميكانى دامىتۋ ءۇشىن ەلىمىزدە «لۋ بان شەبەرحاناسى» سياقتى ورتالىقتاردىڭ سانىن كوبەيتۋ ماڭىزدى ەكەنىن اتاپ ءوتتى.