سۋ تاسقىنىنان زارداپ شەككەندەرگە وتەماقى تولەنەدى

شىعىندى انىقتاۋ ءۇشىن ارنايى كوميسسيا قۇرىلادى.

توتەنشە جاعدايلار جونىندەگى ءبىرىنشى ۆيسە-مينيستر يبراگيم كۇلشىمبايەۆ سۋ تاسقىنىنان زارداپ شەككەن قازاقستاندىقتارعا وتەماقى قالاي تولەنەتىنىن ايتتى، دەپ حابارلايدى Almaty-akshamy.kz

«ەگەر ءۇيدى سۋ باسقان بولسا، وتەماقى تولەۋ تۋرالى ءوتىنىش قارالادى. توتەنشە جاعدايلارعا جەرگىلىكتى بيۋدجەتتەن قاراجات قاراستىرىلعان. جەرگىلىكتى بيۋدجەت قاراجاتى جەتكىلىكسىز بولسا، رەسپۋبليكالىق بيۋدجەتتەن قوسىمشا قاراجات بولىنەدى. كەلتىرىلگەن شىعىندى انىقتاۋ ءۇشىن ارنايى كوميسسيا قۇرىلادى. كەيىن وتەماقى تولەنەدى»، - دەدى ۆيسە-مينيستر.

ونىڭ ايتۋىنشا، سۋ باسۋ ىقتيمالدىعى جوعارى وڭىرلەردە – الماتى، جامبىل، تۇركىستان جانە جەتىسۋ وبلىستارىندا ەۆاكۋاسيالاۋ پۋنكتەرى ۇيىمداستىرىلعان.

سونداي-اق بريفينگ بارىسىندا ۆيسە-مينيستر "قازگيدرومەت" بولجامىنا بايلانىستى وڭتۇستىك گارنيزونداردىڭ بارلىق اۋماقتىق بولىمشەلەرى جوعارى دايىندىق رەجيمىنە وتكەنىن ايتتى.

«سۋدى اعىزۋ ءۇشىن 13 مىڭعا جۋىق قاپ كونتەينەرى توسەلدى. ءتورت جۇزدەن استام جەكە قۇرام مەن 71 تەحنيكا جۇمىلدىرىلدى. تۇركىستان وبلىسىنا كومەككە شىمكەنت گارنيزونىنىڭ كۇشتەرى مەن قۇرالدارى دا جىبەرىلدى. قازىرگى ۋاقىتتا جاعداي تۇراقتاندى. 200-دەن استام ادام ەۆاكۋاسيالاندى، ونىڭ ىشىندە 111 بالا تۋىستارىنا ورنالاستىرىلدى. ءقازىر ولار ۇيلەرىنە ورالىپ جاتىر»، - دەدى ۆيسە-مينيستر.

سونداي-اق قۇتقارۋشىلار ازاماتتارعا ءوز اۋلالارىن قاردان، سۋارۋ ارىقتارىن قوقىس پەن مۇزدان تازارتۋ قاجەتتىگىن ەسكەرتتى.