ەكولوگيا جانە تابيعي رەسۋرستار ءمينيسترى ەرلان نىسانبايەۆ ۇكىمەت وتىرىسىندا كوكتەمگى كەزەڭگە ارنالعان اۋا رايى بولجامىنىڭ جاڭارتىلعان دەرەكتەرىن ۇسىندى.
ول ناۋرىز، ءساۋىر ايلارى ادەتتەگىدەن جىلى بولادى دەپ كۇتىلىپ وتىرعانىن ءارى ەلىمىزدىڭ باسىم بولىگىندە جاۋىن-شاشىن كوپ تۇسەتىنىن اتاپ ءوتتى. بۇل كوكتەمنىڭ تەز كەلۋىنە جانە سۋ تاسقىنى ءقاۋپىنىڭ ارتۋىنا ىقپال ەتەدى، دەپ حابارلايدى aqshamnews.kz.
سۋ تاسقىنى ءقاۋپى جوعارى وڭىرلەردىڭ قاتارىندا: اقتوبە، قوستاناي، قاراعاندى، اقمولا، سولتۇستىك قازاقستان، شىعىس قازاقستان وبلىستارى جانە ۇلىتاۋ جانە اباي وبلىستارى بار. قاۋىپتىلىگى ورتاشا وڭىرلەر: الماتى، جەتىسۋ، جامبىل، باتىس قازاقستان جانە اتىراۋ وبلىستارى.
تاسقىن ءقاۋپى تومەن وڭىرلەر: پاۆلودار، ماڭعىستاۋ، تۇركىستان جانە قىزىلوردا وبلىستارى.
«بيىل قازگيدرومەت العاش رەت ءار وبلىس بويىنشا ەگجەي-تەگجەيلى انىقتامالار دايىندادى. بۇل انىقتامالاردا گيدرولوگيالىق بەكەتتەر بويىنشا سۋ دەڭگەيىنىڭ جانە اعىسىنىڭ كۇتىلەتىن ەڭ جوعارى ماندەرى، اعىن كولەمى جانە سونداي-اق ءقاۋىپ ايماعىندا ورنالاسقان ەلدى مەكەندەردى كورسەتە وتىرىپ، بولجامدى باستالۋ كۇندەرى كورسەتىلەدى. سونداي-اق وتكەن اپتادان باستاپ قازگيدرومەت اپتا سايىنعى گيدرولوگيالىق بولجامداردى شىعارا باستادى. گيدرومەتەورولوگيالىق جاعداي كۇرت وزگەرەتىن بولسا «قازگيدرومەت» ەسكەرتۋلەردى 2-3 تاۋلىك بۇرىن حابارلايدى»،
— دەپ اتاپ ءوتتى ەرلان نىسانبايەۆ.