قازاقستاننىڭ دەپوزيتتەرگە كەپىلدىك بەرۋ قورى مەن ماركەتينگ جانە سوسيولوگيالىق زەرتتەۋلەر ينستيتۋتى بىرلەسىپ، ايەلدەردىڭ قارجىلىق ءتارتىبى تۋرالى قىزىقتى ساۋالناما جۇرگىزدى. زەرتتەۋگە 18 بەن 65 جاس ارالىعىنداعى 1980 ايەل قاتىسقان. اqshamnews.kz حابارلاۋىنشا، زەرتتەۋ ناتيجەلەرى ايەلدەردىڭ اقشانى ساقتاۋداعى ادەتتەرى مەن ماقساتتارىن كورسەتەدى.
زەرتتەۋ قورىتىندىسىنا سۇيەنسەك، ايەلدەردىڭ 34%-ى جيعان-تەرگەنىن بانكتە ساقتايدى ەكەن. بۇل سالىمشىلاردىڭ باسىم بولىگى – 81% تەڭگەمەن دەپوزيت اشۋدى تاڭداعان. ال قالعاندارى شەتەل ۆاليۋتاسىن تاڭدايدى.
ساۋالناماعا قاتىسقان 30 جاسقا دەيىنگى قىزداردىڭ 14 پايىزى باسپانا الۋ ءۇشىن، 17 پايىزى قارجىلىق قور جاساۋ ءۇشىن جانە 5 پايىزى بيزنەس اشۋ ءۇشىن اقشا جينايتىنىن مالىمدەگەن.
ال 30 جاستان اسقان ايەلدەردىڭ 12 پايىزى ءۇي ساتىپ الۋدى جوسپارلاسا، 16 پايىزى قارجىلىق قيىندىقتاردىڭ الدىن الۋ ماقساتىندا اقشا جينايتىنىن كورسەتكەن.
زەرتتەۋگە قاتىسقانداردىڭ 12 پايىزى مۇلدە بانككە اقشا سالمايدى. ولار ءوز قارجىسىن بيزنەسكە، جىلجىمايتىن مۇلىككە، باعالى قاعازدارعا جانە باعالى مەتالدارعا ينۆەستيسيالايدى.
زەرتتەۋگە قاتىسقانداردىڭ كوبى وتباسىلى جانە جوعارى ءبىلىمى نەمەسە عىلىمي دارەجەسى بار ايەلدەر ەكەن. ولار كوبىنەسە ساۋدا، قىزمەت كورسەتۋ، بيزنەس جانە ءوندىرىس، سونداي-اق ونەركاسىپ سالاسىندا جۇمىس ىستەيدى. ماماندار زەرتتەۋ ناتيجەلەرىنە قاراپ، قازاقستاندىق ايەلدەردىڭ قارجىلىق ساۋاتىنىڭ ارتىپ كەلە جاتقانىن اتاپ وتۋدە.