سۋ تاسقىنى كەزىندە الاياقتار دا ايلالارىن ىسكە اسىرىپ قالماق

بۇل تۋرالى ق ر مادەنيەت جانە اقپارات ءمينيسترى ايدا بالايەۆا ەسكەرتتى. 

مينيستر زارداپ شەككەندەرگە كومەك كورسەتۋگە قاتىستى  جالعان اقپارات تاراتپاۋعا شاقىردى.  بۇل تۋرالى مينيستر الەۋمەتتىك جەلىدەگى پاراقشاسىندا جازدى، دەپ حابارلايدى Almaty-akshamy.kz.

«قۇرمەتتى دوستار!

ەلىمىز ءقازىر قيىن كەزەڭدى باستان كەشىپ جاتىر. قارعىن سۋ اۋىل-ايماقتى باسىپ، حالىقتىڭ ءۇي-جايى مەن مال-مۇلكىنە وراسان زور شىعىن كەلدى. مۇنداي قيىن-قىستاۋ كەزدە ەل ازاماتتارى جۇدىرىقتاي جۇمىلىپ، بىر-بىرىنە كومەك قولىن سوزۋدا. ارينە، ءتىلسىز جاۋدى اۋىزدىقتاۋ وڭاي بولماسا دا، حالىقتىڭ بىرلىگى مەن ىنتىماعى ارقىلى بۇل سىناقتى دا ەڭسەرەمىز دەپ سەنەمىز.
وسى ۋاقىت ىشىندە بىزگە زارداپ شەككەندەرگە كومەك كورسەتۋگە نيەتى جاندار حابارلاسىپ، كوپتەگەن وتىنىشتەر ءتۇستى. گۋمانيتارلىق كومەكتى قايدا جانە قالاي جىبەرۋگە بولادى دەگەن سۇراقتار كوپ. قاراجاتتى قاي قورعا جانە قانداي شوتقا اۋدارۋعا بولادى؟
بۇل رەتتە، تەك رەسمي اقپارات كوزدەرىنە سەنۋگە شاقىرامىز. رەسمي تۇردە جۇمىس ىستەيتىن قورلار تۋرالى اقپاراتتى جەرگىلىكتى اتقارۋشى ورگاندارعا حابارلاسىپ، بىلە الاسىزدار. قايىرىمدى ءىس جاسار كەزدە جاۋاپكەرشىلىكتى دە ەستەن شىعارمايىق»، - دەپ جازدى ايدا بالايەۆا.