الماتىدا سۋ تاسقىنىنان زارداپ شەككەن وڭىرلەرگە گۋمانيتارلىق كومەك جيناۋ جالعاسۋدا
الماتى قالاسى اكىمىنىڭ ورىنباسارى اسەم ءنۇسىپوۆا المالى كوميۋنيتي ورتالىعىندا سۋ تاسقىنىنان زارداپ شەككەن وڭىرلەرگە گۋمانيتارلىق كومەك جيناۋ پۋنكتىنە باردى، دەپ حابارلايدى almaty-akshamy.kz
كەزدەسۋ بارىسىندا اسەم ءنۇسىپوۆا بارشا ەرىكتىگە قيىن-قىستاۋ كەزەڭدە كومەك قولىن سوزعانى ءۇشىن العىس ءبىلدىردى. اكىمنىڭ ورىنباسارى زارداپ شەككەن وتباسىلار مەن ايماقتارعا قولداۋ كورسەتۋدىڭ ماڭىزىن اتاپ ءوتتى.
«پرەزيدەنتىمىز قاسىم-جومارت كەمەل ۇلى توقايەۆ ايتقانداي – «ءبىزدىڭ كۇشىمىز – بىرلىكتە». ەلىمىز وسى كۇندەرى اۋىر سىناقتى باستان وتكەرىپ جاتىر. ءدال وسى ساتتە بىرلىگىمىز بەن ەلدىگىمىزدى كورسەتەتىن ۋاقىت كەلدى. ەلدەگى بولىپ جاتقان بۇل تابيعاتتىڭ توسىن مىنەزىنە قاتىستى مەملەكەت تاراپىنان، پرەزيدەنتىمىز تاراپىنان بارلىق ءتيىستى شارالار قابىلدانىپ جاتىر. وسى رەتتە سۋ باسقان ايماقتارعا گۋمانيتارلىق كومەك جيناپ، ۇيلەستىرىپ جاتقان ءاربىر جانعا العىس بىلدىرەمىن»، - دەدى اسەم ءنۇسىپوۆا.
ەرىكتىلەر ءوز كەزەگىندە گۋمانيتارلىق كومەكتى ءتيىمدى ۇيىمداستىرۋعا باعىتتالعان باستاماسى مەن يدەياسىمەن ءبولىستى. سونىمەن قاتار، گۋمانيتارلىق كومەكتى جيناۋ جانە تاراتۋ بويىنشا قالامىزدا تاعى قابىلداۋ پۋنكتىن اشۋ بويىنشا جوسپارلار تالقىلاندى.
بۇگىندە الماتىدان سۋ تاسقىنىنان زارداپ شەككەن اتىراۋ وبلىسىنىڭ تۇرعىندارىنا 30 توننادان استام گۋمانيتارلىق كومەك جونەلتىلدى. ونىڭ ىشىندە 12 توننا ازىق-تۇلىك، 10 تونناعا جۋىق كيىم-كەشەك، 7،2 توننا گيگيەنالىق قۇرالدار، 2 توننادان استام تۇرمىستىق زاتتار، 200 كەلىدەن استام دارى-دارمەك جانە ت.ب بار.
ايتا كەتۋ كەرەك، گۋمانيتارلىق كومەك جينالىپ جاتقان بۇل جاستار كوميۋنيتي ورتالىعى الماتىنىڭ ءار اۋدانىندا اشىلعان 8 كوميۋنيتي ورتالىقتىڭ ءبىرى. الماتى قالاسىن دامىتۋدىڭ 2025 جىلعا دەيىنگى باعدارلاماسى اياسىندا ءار اۋداندا ەكىدەن، ياعني بارلىعى 16 ورتالىق اشىلادى.
ءاربىر كوميۋنيتي ورتالىق كرەاتيۆتى قوعامدىق كەڭىستىكتەن تۇرادى. مۇندا جاستاردى قولداۋعا قاجەتتىنىڭ ءبارى بار: بۇل ءارتۇرلى مەملەكەتتىك باعدارلاما بويىنشا كەڭەس بەرۋ، پسيحولوگيالىق جانە زاڭگەرلىك كومەك، NEET جاستارىن قىسقا مەرزىمدى كۋرستار ارقىلى سۇرانىسقا يە ماماندىقتارعا وقىتۋ جانە جۇمىسقا ورنالاستىرۋ.
- گۋمانيتارلىق كومەك مىنا مەكەنجاي بويىنشا قابىلدانادى: بايتۇرسىنوۆا كوشەسى، 22ك1
- قابىلداۋ ۋاقىتى: 10:00-دەن 19:00-گە دەيىن
- كەز كەلگەن ادام المالى اۋدانىنداعى كوميۋنيتي ورتالىققا حابارلاسىپ، قاجەتتى زاتتاردى تاپسىرا الادى!
- بايلانىس نومىرلەرى: +7 747 821 64 78؛ 7 747 540 01 40