100 دومبىراشى سۋ تاسقىنىنان زارداپ شەككەن تۇرعىندارعا كومەك كورسەتكەن ازاماتتارعا العىس ايتىپ، ەرەكشە فلەشموب وتكىزدى
ولار اشىق اسپان استىندا كۇي ورىنداپ، ونەرى ارقىلى وتانداستارىنا قولداۋ كورسەتتى. ارتيستەر كەرەمەت تۋىندىلار ۇلتتىق رۋحتى كوتەرىپ، قازاقستاندىقتاردى قاناتتاندىراتىنا سەنىمدى.
ايتا كەتەيىك، كەشە الماتىلىقتار تابيعي اپاتتان زارداپ شەككەن اتىراۋ وبلىسىنىڭ تۇرعىندارىنا 30 توننادان استام گۋمانيتارلىق كومەك جينادى. بۇل 12 توننا ازىق-تۇلىك، شامامەن 10 توننا كيىم، 7،2 توننادان استام گيگيەنالىق زاتتار، 2 توننادان استام تۇرمىستىق زاتتار، 200 كەلىدەن استام دارى-دارمەك جانە ت.ب. بۇل باعىتتاعى جۇمىس جالعاسىپ وتىر.
سونداي-اق، الماتىلىق اسپاپشى-مۋزىكانتتار قالا تۇرعىندارىن تابيعاتقا ۇقىپتى قاراۋعا، قالادا تازالىق پەن ءتارتىپتى ساقتاۋعا شاقىردى. بۇل فلەشموبقا «الاتاۋ» فولكلورلىق ءانسامبلىنىڭ دومبىراشىلارى مەن جاس تالانتتار قاتىستى.
«مۇنداي جاعدايدا شەتتە قالا المايمىز، ەرىكتىلەر رەتىندە دە قاتىسامىز، سونىمەن بىرگە ءبىز ءوز ەموسيامىز بەن قولداۋىمىزدى شىعارماشىلىعىمىز ارقىلى كورسەتەمىز. سوندىقتان حالىقتى جىگەرلەندىرۋ، قۋاتتاندىرۋ جانە قولداۋ ءۇشىن قازاق كۇيلەرىن ورىنداۋدى ۇيعاردىق. ءبىزدىڭ حالقىمىز ءارقاشان بىرەۋدىڭ قاسىرەتىنە بەي-جاي قارامايتىن، تابيعاتقا ۇلكەن قۇرمەتپەن قارايتىن، تازالىق پەن ءتارتىپتى باعالايتىن. ءقازىر الماتى تۇرعىندارى اۋقىمدى ەكولوگيالىق جوباعا قاتىسىپ، ازاماتتىق بەلسەندىلىك تانىتا الادى»، - دەدى بەلگىلى ارتيست، «الاتاۋ» فولكلورلىق ءانسامبلىنىڭ جەتەكشىسى تۇرسىناي پازىل.
ەستەرىڭىزگە سالا كەتەيىك، قالادا «الماتى – ءبىزدىڭ ورتاق ءۇيىمىز» ناۋقانى ءوتىپ جاتىر. مەگاپوليستىڭ ءاربىر تۇرعىنىن ەكولوگيالىق مادەنيەتتى قالىپتاستىرۋعا باعىتتالعان ءىس-شارالارعا قاتىسۋعا، ەكولوگيالىق جوبالاردى قولداۋعا شاقىرامىز. قالا تۇرعىندارى ءوز اۋلاسىنىڭ اۋماعىنا كوشەت وتىرعىزا الادى، وسىلايشا قالاعا دەگەن سۇيىسپەنشىلىك پەن قامقورلىقتى كورسەتىپ، 20 ساۋىردە وتەتىن جالپىقالالىق سەنبىلىككە قاتىسا الادى.
بارلىق اقپارات almaty.kz سايتىندا، الماتى اكىمدىگىنىڭ الەۋمەتتىك جەلىلەرىندە ورنالاسقان. سونداي-اق، ۆەب-سايتقا ارنايى QR-كود ارقىلى قالا بويىنشا ورنالاستىرىلعان باننەرلەردە، پلاكاتتاردا جانە افيشالاردا كىرۋگە بولادى.
ناۋقاننىڭ بەلسەندى قاتىسۋشىلارىنا ارنالعان الەۋمەتتىك جەلىدەگى حەشتەگتەر: #الماتىناشوبششييدوم، #ناسمنوگوگورودودين، #ءالماتىبىزدىڭورتاقۇيىمىز، #بىزكوپپىزقالاجالعىز.