ءۇشىنشى جىل قاتارىنان سۋ تاپشىلىعى بولادى دەپ بولجانۋدا.
گيدراۆليكالىق بولجامعا سايكەس، 2022 جىلى قازاقستاندا قايتا سۋ تاپشىلىعى بولادى. وسىنى ەسكەرە وتىرىپ، ۆەگەتاسيالىق كەزەڭگە دايىندىق جۇرگىزىلۋدە. ساراپشىلار فەرمەرلەردى ىلعال سىيىمدى داقىلداردىڭ القاپتارىن قىسقارتۋعا جانە ىلعال ۇنەمدەۋ تەحنولوگيالارىن قولدانۋعا شاقىرادى. بۇل تۋرالى AGRITECHNICA digital on tour اياسىندا ۇيىمداستىرىلعان سۋ رەسۋرستارىن باسقارۋ تاقىرىبىنداعى دوڭگەلەك ۇستەل بارىسىندا ەكولوگيا مينيسترلىگى سۋ رەسۋرستارى كوميتەتى ءتوراعاسىنىڭ ورىنباسارى دوسبول بەكماعامبەتوۆ مالىمدەدى، دەپ حابارلايدى Almaty-akshamy.kz Eldala.kz cىلتەمە جاساپ.
«1 اقپانداعى جاعداي بويىنشا، بولجامدار كوڭىل كونشىتپەيدى. ءۇشىنشى جىل، اسىرەسە، وڭتۇستىك ايماقتاردا سۋ تاپشىلىعى بايقالادى. وتكەن جانە ودان ارعى جىلداعىداي ۇقساس سەناريي بولادى دەپ كۇتىلۋدە»، - دەدى دوسبول بەكماعامبەتوۆ.
ەكولوگيا مينيسترلىگىنىڭ جۇمىس باعىتتارىنىڭ ءبىرى تاسىمالداۋ كەزىندە سۋ شىعىنىن ازايتۋ بولىپ تابىلادى، ول بۇگىندە 50%-عا دەيىن جەتەدى. ۇزىندىعى 7،4 مىڭ كم سۋارۋ جەلىلەرىن قايتا جاڭارتۋ، 16 گيدروتەحنيكالىق قۇرىلىستى، كانالداردى قايتا جاڭارتۋ جانە سۋدى ەسەپكە الۋدى سيفرلاندىرۋ جوسپارلانعان.
دوسبول بەكماعامبەتوۆ اتاپ وتكەندەي، سۋارۋعا ارنالعان بارلىق سۋ تارتۋدىڭ 97% جالپى سۋارۋ الاڭى 1 ملن 250 مىڭ گا بولاتىن وڭتۇستىكتەگى ءتورت وڭىرگە - الماتى، جامبىل، تۇركىستان جانە قىزىلوردا وبلىستارىنا تيەسىلى. بۇل رەتتە اتالعان وڭىرلەرگە ەل بويىنشا بارلىق سۋارمالى الاڭنىڭ 77% تيەسىلى. وسىعان بايلانىستى سۋارمالى سۋدىڭ نەگىزگى شىعىندارى دا وسى اۋدانداردا ورىن الۋدا.
«سوڭعى جىلدارى ەلىمىزدىڭ وڭتۇستىك وڭىرلەرىندە ۆەگەتاسيالىق كەزەڭ سۋ تاپشىلىعى سيكلى جاعدايىندا وتۋدە. قابىلدانعان شارالاردىڭ ارقاسىندا وتكەن جىلى فەرمەرلەرىمىزدى سۋارمالى سۋمەن تۇراقتى قامتاماسىز ەتە الدىق. وتكەن جىلداعىداي، ءبىز الدىن الا دايىندىق جۇمىستارىن باستادىق. ۆەگەتاسيالىق كەزەڭ باستالعانعا دەيىن مەملەكەتارالىق پايدالانۋ ارنالارىن قايتا قۇرۋ جالعاسادى»، - دەدى كوميتەت باسشىسىنىڭ ورىنباسارى.
سونداي-اق، ىلعال سىيىمدى جانە مونوداقىلداردىڭ ەگىس القاپتارىن ازايتۋ، سۋ ۇنەمدەۋ تەحنولوگيالارىن ەنگىزۋ، كانالداردى تازارتۋ قاراستىرىلعان. سۋارۋ كەزەكتىلىگى، كوللەكتورلىق-درەناجدىق سۋلاردى قايتا پايدالانۋ ۇيىمداستىرىلادى، سونداي-اق قوسىمشا سورعىلار ورناتىلادى.
«ۇلكەن قارجى ءبولىندى، اتالعان جۇمىس جالعاسۋدا»، - دەپ اتاپ ءوتتى دوسبول بەكماعامبەتوۆ.