2021 جىلى قازاقستان ۇلتتىق بانكى مەن ەكىنشى دەڭگەيلى بانكتەر قۇنى 1 577 400 تەڭگە بولاتىن 519 جالعان اقشا بەلگىسىن (513 بانكنوت جانە 6 مونەتا) انىقتادى. بۇل 2020 جىلعا قاراعاندا 37% از (823 جالعان اقشا بەلگىسى)، دەپ حابارلايدى اlmaty-akshamy.kz قازاقپاراتقا سىلتەمە جاساپ.
قارجى ۇيىمىنىڭ بانكنوتتار مەن مونەتالاردى ساراپتاۋ باسقارماسىنىڭ باستىعى اسقات مۇقامادييەۆتىڭ ايتۋىنشا، وتكەن جىلى نومينالى 2 000 تەڭگەلىك بانكنوتتار قولدان كوپ جاسالعان – 340 دانا، بۇل – انىقتالعان جالعان اقشالاردىڭ جالپى سانىنىڭ 65%-ى.
ودان كەيىن كوپ جاسالعان نومينال – 5 000 تەڭگەلىك بانكنوتتار – 94 دانا (15%)، 10 000 تەڭگەلىك بانكنوت – 36 دانا (7%). قالعان 13% بانكنوت باسقا نومينالدارىنا تيەسىلى.
جالعان بانكنوتتاردىڭ كوپ بولىگى الماتىدا انىقتالدى – 355 دانا (جالپى ساننىڭ 68%)، ودان كەيىنگى ورىنداردا نۇر-سۇلتان قالاسى – 54 دانا جانە شىعىس قازاقستان وبلىسى – 26 دانا.
شىنايى بانكنوتتى جالعان اقشادان اجىراتۋ ءۇشىن ءتۇپنۇسقاداعى بىرنەشە بەلگىنى ءبىلۋ ماڭىزدى.
قولدان جاسالعان بانكنوتتاردىڭ نەگىزگى بولىگى ءتۇپنۇسقاداعى قانداي دا ءبىر بەلگىلەردى يميتاسيالايتىن جەڭىلدەتىلگەن تەحنولوگيامەن دايىندالادى. «سەزىن-قارا-اۋدارىپ كور» ءادىسىن قولدانا وتىرىپ، ارنايى جابدىقسىز-اق جالعان بانكنوتتى انىقتاۋعا بولادى.
ءتۇپنۇسقا بانكنوتتىڭ بىرنەشە ايرىقشا بەلگىسى بار.
بىرىنشىدەن، ول وزىنە ءتان دىبىسپەن ەرەكشە شىتىرلايدى، ەكىنشىدەن – ارنايى رەلەفى بار.
سونىمەن قاتار بارلىق بانكنوتتا كورۋ قابىلەتى ناشار ادامدار ءۇشىن ساۋساقتىڭ ۇشىمەن جاقسى اجىراتۋعا بولاتىن بەلگىلەر بار. 1000، 2000، 5000، 10000 جانە 20000 تەڭگەلىك كۋپيۋرالاردا بانكنوتتىڭ كولبەۋ بۇرىشىن وزگەرتكەن كەزدە بەينەلەردىڭ ءتۇسى جاسىلدان التىن تۇستەس وڭگە وزگەرەتىن قاسيەتى بار.
سونىمەن بىرگە جارىققا توسىپ قاراعان كەزدە ءبىر تۇتاس ءجىپ رەتىندە انىق كورىنەتىن، جازۋى بار پۋنكتير تۇرىندەگى تۇتاس ماگنيتتى جانە ۇزىك-ۇزىك جىپكە نازار اۋدارعان ءجون.
وسى ەرەكشەلىكتەردىڭ ءوزى ارنايى جابدىقتى پايدالانباي-اق بانكنوتتىڭ ءتۇپنۇسقالىلىعىن تەز ارادا تەكسەرىپ الۋعا مۇمكىندىك بەرەدى.