سۋ سالاسىنىڭ ماماندارى «بولاشاق» باعدارلاماسى بويىنشا اقش پەن اۆستراليادا ءبىلىم الادى.
قازاقستاندىق سۋشىلارعا شەتەلدە وقۋعا مۇمكىندىك جاساۋ ءۇشىن سۋ رەسۋرستارى جانە يرريگاسيا مينيسترلىگى ق ر عىلىم جانە جوعارى ءبىلىم مينيسترلىگىمەن كەلىسىم جاسادى، دەپ حابارلايدى aqshamnews.kz.
كەلەسى جىلى مينيسترلىكتىڭ ەكى قىزمەتكەرى امەريكا قۇراما شتاتتارىندا وقۋ تاعىلىمداماسىنان وتەدى. تاعى ءبىر مامان «بولاشاق» باعدارلاماسى بويىنشا اۆستراليادا، ماگيستراتۋرادا ءبىلىم الادى.
ەسكە سالساق، سۋ رەسۋرستارى جانە يرريگاسيا مينيسترلىگىنىڭ باستاماسى بويىنشا بيىل «بولاشاق» باعدارلاماسىنا «گيدروگەولوگيا»، «سۋ رەسۋرستارى» سەكىلدى وقۋ باعدارلامالارى قوسىلعان بولاتىن. وسىنىڭ ناتيجەسىندە، قازاقستاندىقتار اتالعان ماماندىقتار بويىنشا شەتەلدە ءبىلىم الۋ مۇمكىندىگىنە يە بولدى.
«سۋ شارۋاشىلىعى سالاسى ماماندارىنىڭ بىلىكتىلىگىن ارتتىرۋ مينيسترلىك جۇمىسىنىڭ باسىم باعىتتارىنىڭ ءبىرى بولىپ تابىلادى. بۇگىنگى تاڭدا ۆەدومستۆو جۇڭگو، نيدەرلاندى، فرانسيا سىندى مەملەكەتتەرمەن جانە حالىقارالىق ۇيىمدارمەن تاجىريبە الماسۋ جانە بىرلەسىپ مامان داريالاۋ جونىندە كەلىسىم جاسادى. بيىل نيدەرلاندى ساراپشىلارى استانا جانە اقتوبە قالالارىندا سۋ تاسقىنى ءقاۋپىن باسقارۋ بويىنشا 3 مارتە وقۋ سەمينارىن وتكىزدى. وسىنىڭ ناتيجەسىندە سۋ تاسقىنىنا قارسى ءىس-قيمىل ماسەلەلەرىمەن اينالىساتىن 50-دەن استام قازاقستاندىق مامان بىلىكتىلىك ارتتىردى»،- دەدى سۋ رەسۋرستارى جانە يرريگاسيا ءبىرىنشى ۆيسە-مينيسترى بولات بەكنياز.
سونىمەن قاتار، جازدا «قازسۋشار» مەكەمەسىنىڭ ماماندارى جاپونيانىڭ ساپپورو قالاسىندا ءۇش ايلىق وقۋ كۋرسىنا قاتىستى. ال، قىزىلوردا وبلىسى بويىنشا «قازسۋشار» فيليالى ديرەكتورىنىڭ ورىنباسارى وڭتۇستىك كورەيا مەملەكەتىنە بارىپ، تاجىريبە الماسىپ قايتتى.