2040 جىلدارعا قاراي قازاقستانداعى سۋ تاپشىلىعى 12-15 ميلليارد تەكشە مەترگە جەتۋى مۇمكىن. بۇل تۋرالى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاعان مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«سۋ رەسۋرسى ەلىمىزدەگى وزەكتى ماسەلەلەردىڭ ءبىرى. اسىرەسە، سۋدىڭ ساپاسى جانە ونىڭ حالىققا قولجەتىمدى بولۋى اسا ماڭىزدى بولىپ تۇر. جىل وتكەن سايىن حالقىمىزدىڭ سانى دا، ەكونوميكامىز دا وسەدى. بۇل – قالىپتى قۇبىلىس. سول سەبەپتى 2040 جىلدارعا قاراي قازاقستانداعى سۋ تاپشىلىعى 12-15 ميلليارد تەكشە مەترگە جەتۋى مۇمكىن»، - دەدى پرەزيدەنت.
مەملەكەت باسشىسى ترانسشەكارالىق سۋ كوزدەرىنە تاۋەلدى ەل ەكەندىگىمىزگە نازار اۋدارتتى.
«ەۋرازيا قۇرلىعىنداعى وزەندەر مەن كانالدار – بارشامىزعا ورتاق تابيعات بايلىعى. وسى سۋ كوزدەرى ءبىزدىڭ حالىقتارىمىزدى، ەكونوميكامىزدى جاقىنداستىرادى. سوندىقتان كورشىلەس ءارى دوستاس ەلدەرمەن بۇل ماسەلە بويىنشا ءاردايىم ءوزارا تۇسىنىستىككە جانە كەلىسىمگە كەلۋ كەرەك. جان-جاقتى ويلاستىرىلعان سۋ ساياساتىن جۇرگىزۋ، ترانسشەكارالىق سۋلاردى پايدالانۋ ماسەلەلەرىن شەشۋ – ۇكىمەتتىڭ الدىندا تۇرعان اسا ماڭىزدى مىندەتتەر»، - دەدى پرەزيدەنت.