اتوم ەلەكتر ستانساسىن سالۋ ماسەلەسىن جالپىۇلتتىق رەفەرەندۋم ارقىلى شەشكەن ءجون. بۇل تۋرالى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاعان مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz.
«اتوم ەنەرگەتيكاسىن دامىتۋ اسا ماڭىزدى ەكونوميكالىق جانە ساياسي ماسەلەگە اينالدى. اتوم ەلەكتر ستانسياسىن سالۋ قاجەت پە، جوق پا دەگەن ساۋالعا قاتىستى ءتۇرلى پىكىر بار ەكەنىن بىلەسىزدەر. قازاقستان – الەمدەگى ەڭ ءىرى ۋران ءوندىرۋشى مەملەكەت. ەندەشە ءوز جەرىمىزدە اتوم ستانسياسىن سالۋعا ابدەن قاقىمىز بار. كەيبىر ساراپشىلار شاعىن يادرولىق ستانسيالار سالۋ كەرەك دەگەن پىكىر ايتادى. الايدا كوپتەگەن ازامات پەن ءبىرقاتار ساراپشىلار يادرولىق ستانسيانىڭ قاۋىپسىزدىگىنە كۇمانمەن قارايدى»، - دەدى قاسىم-جومارت توقايەۆ.
مەملەكەت باسشىسى سەمەي پوليگونى حالقىمىزعا قانشاما قاسىرەت اكەلگەنىن ەسكەرسەك، ولاردىڭ كۇدىگىن تۇسىنۋگە بولاتىندىعىن باسا ايتتى.
«سوندىقتان بۇل ماسەلە بويىنشا قوعامدىق تىڭداۋلاردى، ەگجەي-تەگجەيلى، كەڭ اۋقىمدى تالقىلاۋلاردى جالعاستىرۋىمىز كەرەك. ءبىز ماڭىزدى ستراتەگيالىق ماسەلەلەرگە قاتىستى تۇپكى شەشىمدى رەفەرەندۋم ارقىلى قابىلداۋىمىز قاجەت. بۇل – 2019 جىلى سايلاۋ الدىندا مەنىڭ حالىققا بەرگەن ۋادەم. اتوم ەلەكتر ستانسياسىن سالۋ نەمەسە سالماۋ ماسەلەسى – بۇل ەلىمىزدىڭ بولاشاعىنا قاتىستى اسا ماڭىزدى ماسەلە. سوندىقتان ونى جالپىۇلتتىق رەفەرەندۋم ارقىلى شەشكەن ءجون دەپ سانايمىن. ناقتى مەرزىمىن كەيىن انىقتايمىز»، - دەدى پرەزيدەنت.