الماتى پوليسياسى ءىرى كولەمدەگى ەسىرتكىنى تاركىلەدى

40 جاستاعى ج. ەسىمدى ازامات اسا ءىرى كولەمدە سينتەتيكالىق ەسىرتكىنى زاڭسىز ساتۋمەن جانە ساقتاۋمەن اينالىسقان.

الماتى پوليسياسى “سينتەتيكانىڭ” ءىرى پارتياسىن تاركىلەدى، – دەپ حابارلايدى Almaty-akshamy.kz Polisia.kz-كە سىلتەمە جاساپ.

الماتى قالاسى تۇركسىب اۋدانىنىڭ 40 جاستاعى تۇرعىنى سينتەتيكالىق ەسىرتكىنى دايىنداۋ جانە تاراتۋ بويىنشا قىلمىستىق ارەكەتپەن اينالىسقان. ول الماتى قالاسى پروكۋراتۋراسىنىڭ ۇيلەستىرۋىمەن “قاراسورا – 2023” ءىس-شاراسى اياسىندا جۇرگىزىلگەن ارنايى وپەراسيا ناتيجەسىندە ۇستالدى.

اتالعان دەرەك ق ر قك-نىڭ 297-بابى 1-بولىگى (ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ) بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى. سوت سانكسياسىمەن كۇدىكتىنىڭ ءۇيىن ءتىنتۋ كەزىندە ۇنتاق تۇرىندەگى سۇر ءتۇستى زات جانە ەرەكشە ءيىسى بار تۇيىرشىكتەر سالىنعان 2 پوليەتيلەن بايلامى، سونداي-اق ەلەكتروندى تارازىلار، وراۋىش بايلامدار، سۇيىقتىعى بار قۇتى تابىلىپ، تاركىلەندى.

«سوت-حيميالىق ساراپتاماسىنىڭ قورىتىندىسى بويىنشا، جالپى سالماعى 5 كەلىدەن اساتىن الفا-pvp ەسىرتكى زاتى تابىلدى. ايتا كەتۋ كەرەك، بۇل سينتەتيكالىق پرەپارات مەفەدروننان بىرنەشە ەسە زياندى. ەسىرتكى ساتۋشى ۋاقىتشا ۇستاۋ يزولياتورىنا قامالدى. قالاعا وندىرىسكە قاجەتتى شيكىزاتپەن قامتاماسىز ەتەتىن ارنا انىقتالۋدا»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.

ق ر قپك-نىڭ 201-بابىنا سايكەس وزگە اقپاراتتار تەرگەۋ مۇددەسىنە وراي جاريالاۋعا جاتپايدى. ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قپك-نىڭ 19-بابى 1-بولىگىنە سايكەس، زاڭدى كۇشىنە ەنگەن سوت ۇكىمىمەن بەلگىلەنگەنگە دەيىن ءاربىر ادام قىلمىستىق قۇقىق بۇزۋشىلىق جاساۋدا كىناسىز دەپ تانىلادى.