سۋ قۇبىرىن كۇردەلى جوندەۋ بەلگىلەنگەن مەرزىمنەن بۇرىن اياقتالدى

اتىراۋ وبلىسىندا كەشەندى كۇردەلى جوندەۋ ناتيجەسىندە كەڭەيتىلگەن «استراحان-ماڭعىشلاق» ماگيسترالدى سۋ قۇبىرى ىسكە قوسىلدى. ق ر پرەمەر-مينيسترى ءاليحان سمايىلوۆ بەينەبايلانىس ارقىلى نىسان جۇمىسىن رەسمي تۇردە ىسكە قوستى.

باتىس ءوڭىرىنىڭ الەۋمەتتىك جانە ونەركاسىپتىك دامۋى ءۇشىن ستراتەگيالىق ماڭىزى زور جوبانى مەملەكەت باسشىسى قاسىم-جومارت توقايەۆتىڭ تاپسىرماسى بويىنشا جۇزەگە اسىرىلدى.

پرەمەر-مينيستر اتاپ وتكەندەي، قايتا جاڭعىرتىلعان «استراحان-ماڭعىشلاق» ماگيسترالدى سۋ قۇبىرى اتىراۋ جانە ماڭعىستاۋ وبلىستارىنىڭ حالقى مەن كاسىپورىندارى جانە اۋىل شارۋاشىلىعى ءۇشىن قوسىمشا 60 مىڭ تەكشە مەتر سۋ بەرۋ كوزىنە اينالادى.

جوبا شەڭبەرىندە توزىعى جەتكەن جابدىقتاردى جاڭارتۋ جۇمىستارى جۇرگىزىلىپ، ۇزىندىعى شامامەن 177 شاقىرىم ماگيسترالدى سۋ قۇبىرىنىڭ ەكى ۋچاسكەسى اۋىستىرىلدى. قۇرىلىسقا 500-دەن استام ادام جۇمىلدىرىلعان. سونىڭ ناتيجەسىندە «استراحان-ماڭعىشلاق» سۋ قۇبىرىنىڭ وتكىزۋ قابىلەتى تاۋلىگىنە 110-نان 170 مىڭ تەكشە مەترگە دەيىن ارتتى.

«سۋ قۇبىرىن كۇردەلى جوندەۋ بەلگىلەنگەن مەرزىمنەن بۇرىن اياقتالدى. وعان ءتيىمدى جوبالىق شەشىمدەر مەن جوعارى قۇرىلىس قارقىنى ناتيجەسىندە قول جەتكىزىلدى. بۇل جوبا سوڭعىسى ەمەس، وڭىردە سۋمەن قامتاماسىز ەتۋگە بايلانىستى باسقا دا اۋقىمدى جوبالار بار»، — دەدى ءاليحان سمايىلوۆ.

ماسەلەن، كەندىرلى كەنتىندە جالپى قۋاتى تاۋلىگىنە 50 مىڭ تەكشە مەتر بولاتىن سۋ تۇششىلاندىرۋ زاۋىتى سالىنۋدا. ودان جاڭاوزەن قالاسىنا دەيىن ۇزىندىعى 105 كم ماگيسترالدى سۋ قۇبىرى تارتىلادى. 

بۇدان باسقا، «كاسپيي» سۋمەن جابدىقتاۋ زاۋىتىن رەكونسترۋكسيالاۋ جۇرگىزىلىپ جاتىر. ناتيجەسىندە ونىڭ قۋاتى 2 ەسە، ياعني 40 مىڭ تەكشە مەترگە دەيىن ارتادى.

«ءبىزدىڭ ماقساتىمىز – 2026 جىلعا قاراي ەلدى مەكەندەردى 100% اۋىز سۋمەن قامتاماسىز ەتىپ، حالىق پەن ءوندىرىس ورىندارىن ودان ءارى تۇراقتى سۋ كوزدەرىمەن قامتاماسىز ەتۋ. ول ءۇشىن جاڭا گيدروتەحنيكالىق قۇرىلىستار مەن سۋ قۇبىرلارىن سالۋ جانە قازىرگى قۇبىرلاردى جاڭعىرتۋ بويىنشا جوبالار ىسكە اسىرىلىپ وتىر. ەلدى مەكەندەرگە سۋ تاراتۋ جەلىلەرى سالىنۋدا، ال شالعاي اۋىلداردا جەر استى كوزدەرىنەن سورعى مودۋلدەرى ورناتىلىپ جاتىر. الدىمىزدا ءالى دە كوپ جۇمىس بار»، — دەپ اتاپ ءوتتى ۇكىمەت باسشىسى.

«قازمۇنايگاز» ۇك» اق باسقارما ءتوراعاسى ماعزۇم مىرزاعالييەۆ ءمالىم ەتكەندەي، جوبانى ىسكە اسىرۋ كەزىندە تەلەكوممۋنيكاسيالىق جانە باقىلاۋ جابدىقتارى، كاتودتى قورعاۋ ستانسالارى مەن اۆتونومدى گيبريدتى قوندىرعىلار، سونداي-اق قۇبىر ونىمدەرىنىڭ ءبىر بولىگى وتاندىق وندىرۋشىلەردەن ساتىپ الىندى.

رەسمي سالتاناتتى شاراعا اتىراۋ وبلىسىنىڭ اكىمى سەرىك شاپكەنوۆ، ەنەرگەتيكا ءمينيسترى الماسادام ساتقالييەۆ، «سامۇرىق-قازىنا» اق باسقارما ءتوراعاسى نۇرلان جاقىپوۆ، «قازترانسويل» اق باس ديرەكتورى تالعات قۇرمانبايەۆ، «ماگيسترالدى سۋاعىزعى» ج ش س باس ديرەكتورى بەرىك سالپەك جانە مەردىگەر ۇيىمداردىڭ وكىلدەرى قاتىستى.

انىقتاما: «استراحان-ماڭعىشلاق» ماگيسترالدى سۋ قۇبىرى 1988 جىلى پايدالانۋعا بەرىلگەن. اتالعان سۋ قۇبىرى – اتىراۋ وبلىسىنىڭ قۇرمانعازى، يساتاي جانە جىلىوي اۋداندارى، سونداي-اق ماڭعىستاۋ وبلىسىنىڭ جاڭاوزەن قالاسى، بەينەۋ، ماڭعىستاۋ، قاراقيا جانە ءتۇپقاراعان اۋداندارىنىڭ تۇتىنۋشىلارىن سۋمەن قامتاماسىز ەتەتىن جالعىز ورتالىقتاندىرىلعان سۋ كوزى. جالپى، اتالعان قۇبىردان سۋدى ماڭعىستاۋ وبلىسى تۇرعىندارىنىڭ 35%-دان استامى جانە اتىراۋ وبلىسى تۇرعىندارىنىڭ 28%-دان استامى تۇتىنادى.