سۋ قويمالارىنا ساعات سايىن مونيتورينگ جۇرگىزىلەدى

اقمولا وبلىسىندا استانا جانە سىلەتى سۋ قويمالارى 100%-عا تولى. ەكى نىسان دا شتاتتىق كەستەگە ساي جۇمىس ىستەپ تۇر، دەپ حابارلايدى Almaty-akshamy.kz.

سولتۇستىك قازاقستان وبلىسىنداعى 2 ءىرى سۋ قويماسى 100%-عا تولى، وڭىردە سۋ تاسقىنى جالعاسىپ جاتىر. سەرگەيەۆ سۋ قويماسى بوگەتىنىڭ جوتاسىنان سۋدىڭ اسۋ بيىكتىگى 348 سانتيمەتر.

وسى ساعاتقا پەتروپاۆل قالاسى شەگىندەگى ەسىل وزەنىنىڭ دەڭگەيى - 1284 سم، ءبىر تاۋلىكتە 28 سم تومەندەدى.

اقتوبە وبلىسىنداعى ەكى ءىرى سۋ قويماسىنىڭ ورتاشا سۋ جيناۋ كورسەتكىشى 97%. ەكى نىسان دا شتاتتىق كەستەگە ساي جۇمىس ىستەپ جاتىر. وڭىردەگى احۋال تۇراقتى.

شىعىس قازاقستان وبلىسىنداعى ەكى ءىرى سۋ قويماسى بويىنشا ورتاشا سۋ جيناۋ كورسەتكىشى 81%.

اباي وبلىسىندا ءشۇلبى سۋ قويماسى 67%-عا تولدى. وڭىردە سۋ تاسقىنى جالعاسىپ جاتىر. ءشۇلبى سۋ قويماسىنا بۇيىرلىك اعىنداردىڭ ۇلعايۋىنا بايلانىستى تابيعاتتى قورعاۋ ماقساتىندا سۋ جىبەرىلىپ جاتىر. ەرتىس كاسكادىنىڭ سۋ قويمالارى شتاتتىق كەستەگە سايكەس جۇمىس ىستەپ جاتىر.

باتىس قازاقستان وبلىسىنداعى ءتورت ءىرى سۋ قويماسىنىڭ ورتاشا سۋ جيناۋ كورسەتكىشى 85%. ولاردىڭ بارلىعى شتاتتىق رەجيمدە جۇمىس ىستەيدى. رەسەيمەن شەكارادا جايىق وزەنىنىڭ دەڭگەيى 899 سم.

قاراعاندى وبلىسىنداعى 3 ءىرى سۋ قويماسى 98%-عا تولعان. جاعداي تۇراقتى.

قوستاناي وبلىسىندا ەكى ءىرى سۋ قويماسىنىڭ ورتاشا سۋ جيناۋ كورسەتكىشى 92%. ەكى نىساننىڭ دا جۇمىسى شتاتتىق كەستەگە سايكەس ءجۇرىپ جاتىر.

نىسانداردا تاۋلىك بويى كەزەكشىلىك جالعاسادى، ساعات سايىن سۋ شارۋاشىلىعى جاعدايىنا مونيتورينگ جۇرگىزىلەدى.