سۋ باسۋ ءقاۋپى بار جەرلەردە كەزەكشىلىك ۇيىمداستىرىلدى

جەرگىلىكتى گيدرومەتەورولوگيالىق جاعدايلاردى ەسكەرە وتىرىپ، سۋ تاسقىنىنا قارسى ءىس-شارالار كەشەنى ازىرلەندى.

رەسپۋبليكالىق جولدارداعى سۋ باسۋ ءقاۋپى بار ۋچاسكەلەردە تاۋلىك بويى كەزەكشىلىك جانە پاترۋلدەۋ ۇيىمداستىرىلدى، دەپ حابارلايدى Almaty-akshamy.kz قازاۆتوجول-دىڭ اقپاراتىنا سىلتەمە جاساپ.

قابىلدانعان ءىس-شارالار كەشەنى رەسپۋبليكالىق ماڭىزى بار اۆتوجولداردا ءقاۋىپسىز قوزعالىستى، سونداي-اق جاساندى قۇرىلىستاردىڭ ساقتالۋىن قامتاماسىز ەتۋگە باعىتتالعان.

مەردىگەر ۇيىمدار مەن جول قىزمەتتەرىنە سۋ باسۋ ءقاۋپىن الدىن الۋ بويىنشا ناقتى تاپسىرمالار بەرىلدى. وتكەن جىلدارداعى سۋ تاسقىنى كەزەڭىنىڭ ناتيجەلەرىنە سايكەس سۋ باسۋ ءقاۋپى جوعارى رەسپۋبليكالىق اۆتوجولداردىڭ ۋچاسكەلەرى انىقتالدى.

ارنايى الدىن الۋ شارالارىنا:

سۋ وتكىزۋ قۇبىرلارى مەن كوپىر استى ايماقتارىنىڭ ارنالارىن قار مەن مۇزدان تازارتۋ؛

سۋ تاسقىنى ءقاۋپى بار ۋچاسكەلەردى كۇندەلىكتى تەكسەرۋ؛

ينەرتتى ماتەريالداردى دايىنداۋ جانە ت.ب. جاتادى.

350-دەن استام ءقاۋىپتى ۋچاسكە ەرەكشە باقىلاۋدا.

رەسپۋبليكالىق ماڭىزى بار اۆتوجولدار اشىق، سۋ باسىپ، شايىلىپ كەتكەن ۋچاسكەلەر جوق.