وسكەلەڭ ۇرپاقتىڭ جۇرەگىندە وتانعا دەگەن سۇيىسپەنشىلىك بيىك بولۋعا ءتيىس. الماتى قالاسىنداعى «كاسپيي» كوللەدجىنىڭ «جاس بۇركىت» اسكەري-پاتريوتتىق قوزعالىسىنىڭ 300-گە جۋىق ستۋدەنتىنە ۇلتتىق ۇلاننىڭ كەڭەس وداعىنىڭ باتىرى، گۆارديا پولكوۆنيگى باۋىرجان مومىش ۇلى اتىنداعى 5571 اسكەري بولىمىندە «اشىق ەسىك كۇنى» ءوتتى، دەپ حابارلايدى اlmaty-akshamy.kz.
جاستار اۋەلى اسكەري ءبولىمنىڭ اۋماعىنا كىرىپ، ساپتىق الاڭعا ساپقا تۇرعىزىلدى. سودان كەيىن رادياسيالىق حيميالىق بيولوگيالىق قورعانىس مۇلىكتەرىمەن جاقىن تانىسىپ، ولاردى كيۋ ءتارتىبىن ۇيرەنىپ، قورعانىس قۇرالىن جىلدام كيۋ بويىنشا كىشىگىرىم جارىس تا ۇيىمداستىرىلدى. جاقسى ناتيجە كورسەتكەن ستۋدەنتتەرگە سىيلىقتار تابىستالدى.
ستۋدەنتتەرگە قىزمەتتىك يتتەردى پايدالانا وتىرىپ كورسەتىلگەن ساباق قاتتى ۇنادى. كينولوگيالىق قىزمەت ماماندارى قىزمەتتىك يتتەرمەن قىلمىسكەردى ۇستاۋ ءىس-قيمىلىن كورسەتكەن بولاتىن.
ءىس-شارا سوڭىندا ءبولىمىنىڭ مادەني-دەمالىس ورتالىعىندا «ۇلى دالا ۇلاندارى» دەرەكتى ءفيلمى كورسەتىلدى.
«جاس بۇركىت» اسكەري-پاتريوتتىق قوزعالىسىنىڭ ستۋدەنتى جانار قايرات:
«بىزگە اسكەردە ءوزىڭدى قالاي دۇرىس ۇستاۋ كەرەكتىگىن، قارۋ-جاراقتى دۇرىس قولدانۋ ءتارتىبىن جانە اسكەري تەحنيكالاردى كورسەتتى، نە ءۇشىن قاجەتتىگىن ءتۇسىندىردى. كازارمامەن تانىستىردى. ءار ساربازدىڭ ورىندىقتارىن، ولاردىڭ نومىرلەنگەنىن، جاتىن توسەكتەرىن كوردىك. قىزمەتتىك يتتەردىڭ پارمەندەر بويىنشا جاتتىعۋلاردى ەكى ەتپعي ورىنداۋىن تاماشالادىق. ماعان اسكەري وركەستردىڭ ورىنداعان پاتريوتتىق اندەرى ەرەكشە اسەر ەتتى. بويىمدى ماقتانىش سەزىمى كەرنەدى»، – دەيدى.