بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك ايتتى.
ءمينيستردىڭ سوزىنشە، مەملەكەتتە ستۋدەنتتەردى تولىقتاي گرانتپەن قامتۋعا مۇمكىندىك جوق، دەپ حابارلايدى Almaty-akshamy.kz
بۇگىن ەلوردادا ءوتىپ جاتقان «ادامي كاپيتال - جاڭا قازاقستان دامۋىنىڭ نەگىزگى رەسۋرسى» فورۋمىندا تىلشىلەر مينيستردەن جوعارى وقۋ ورنىنا تۇسەتىن تالاپكەرلەردى تولىقتاي مەملەكەتتىك گرانتپەن قامتۋ مۇمكىندىگىنە قاتىستى سۇرادى.
«تولىقتاي قامتۋ مۇمكىن ەمەس. سەبەبى ۇلكەن دەموگرافيالىق تولقىن بار. بىلتىرمەن سالىستىرعاندا، ستۋدەنتتەردىڭ كونتينگەنتى 6 پايىزعا ءوستى جانە الداعى ۋاقىتتا تاعى دا ارتا تۇسەدى. قازىرگى كەزدە 600 مىڭنان استام ستۋدەنت بولسا، 6-7 جىلدا 1 ملن-عا جەتىپ قالادى. دەموگرافيانىڭ ءوسۋى قۋانتارلىق جاعداي»، - دەدى س. نۇربەك.
وسى ورايدا مينيستر ەلىمىزدەگى بارلىق ۋنيۆەرسيتەتتەگى ستۋدەنتتەردى تولىقتاي گرانتپەن قامتۋعا مەملەكەتتىڭ مۇمكىندىگى جوق ەكەنىن ايتتى.
«ءقازىر دەموگرافيالىق ەلەۋلى تولقىن مەكتەپكە دەيىنگى جانە ورتا ءبىلىم سالاسىنا اسەر ەتىپ وتىر. ەندى بۇل تولقىن الداعى ۋاقىتتا جوعارى ءبىلىم سالاسىنا دا ءوز ىقپالىن تيگىزەدى. بۇل تۇرعىدا ينفراقۇرىلىمعا، كادر، ءبىلىم بەرۋ باعدارلامالارىنا اسەرىن سەزىنەمىز»، - دەدى ۆەدومستۆو باسشىسى.
سونىمەن قاتار س. نۇربەك ستۋدەنتتەردى كەڭىنەن قامتۋ ءۇشىن مەملەكەتتىك گرانتپەن قاتار، ءبىلىم بەرۋ كرەديتتەرىنە دە ەكپىن قويىلاتىنىن جەتكىزدى.
«بۇل رەتتە وقۋ كرەديتتەرىن جاڭعىرتامىز. وسى باعدارلامانى جانداندىرىپ، باسقا ۇلگىدە باستاماقپىز. ياعني شەتەل تاجىريبەسىن پىسىقتاپ، زەرتتەدىك»، - دەدى مينيستر.
بۇدان بۇرىن حابارلانعانداي، بيىل وقۋ جىلىنا بولىنگەن 88 مىڭ گرانتتىڭ كوبى ءوز يەسىن تاپقان. جالپى، گرانت تاعايىنداۋ جۇمىستارى 25 تامىزعا دەيىن اياقتالۋعا ءتيىس.
ستۋدەنتتەرگە باعا قويۋ كەزىندە ونىڭ اكادەميالىق بىلىمىمەن بىرگە الەۋمەتتىك جانە زەرتتەۋ بەلسەندىلىگىن ەسكەرەتىن پيلوتتىق جوبا قولعا الىنادى.