جىلدا تامىز ايىندا جالعا بەرىلەتىن پاتەر اقىسى قىمباتتايدى.
الماتىنىڭ بوستاندىق، المالى، مەدەۋ اۋداندارىنىنان پاتەر جالداعىسى كەلەتىندەردىڭ سانى وتە كوپ، دەپ حابارلايدى Almaty-akshamy.kz قازاقپاراتقا سىلتەمە جاساپ.
مۇنداي پىكىردى ونلاين بريفينگ بارىسىندا قازاقستان ريەلتورلار قاۋىمداستىعىنىڭ ماماندارى ايتتى.
قازاقستان ريەلتورلارىنىڭ ءوزىن-وزى رەتتەيتىن قاۋىمداستىعى پرەزيدەنتىنىڭ كەڭەسشىسى نينا لۋكيانەنكو جالعا بەرىلەتىن تۇرعىن ءۇي باعاسى نەدەن قالىپتاساتىنىن ايتتى.
«نارىقتىق ەكونوميكا سۇرانىس پەن تولەمگە قابىلەتتى ۇسىنىستىڭ اسەرىنەن باعانى قالىپتاستىرۋعا مۇمكىندىك بەرەدى. جاسىراتىنى جوق، سوڭعى ايلاردا جالداۋ قۇنى ايتارلىقتاي ءوستى، ءبىراق ءبارى ۇمىتىپ كەتەتىن تاعى ءبىر ەكونوميكالىق پروسەستى ەستە ۇستاعان ءجون. وكىنىشكە قاراي، بيىل 15% اياسىندا ينفلياسيا ءدالىزى جاريالاندى. بۇل باعانىڭ بارلىعىنا دا وسەتىنىن بىلدىرەدى، ال جالداۋ – نارىقتا ۇسىنىلاتىن قىزمەت»، - دەيدى سپيكەر.
بىرىككەن ريەلتورلار قاۋىمداستىعىنىڭ مۇشەسى ورىنباسار ساتايەۆ ءوز كەزەگىندە، جالعا الاتىن پاتەرلەرگە سۇرانىس جوعارى ەكەنىن اتاپ ءوتتى.
«بىرىنشىدەن، سۇرانىس بار. سايكەسىنشە باعا دا وسەدى. مىسالى، الماتىنىڭ بوستاندىق، المالى، مەدەۋ اۋداندارىنىنان پاتەر جالداعىسى كەلەتىندەردىڭ سانى وتە كوپ. سەبەبى، جوعارى وقۋ ورىندارى وسى اتالعان اۋدانداردا شوعىرلانعان. جالپى، باعانىڭ كوتەرىلۋى – الەمدىك تەندەسيا، تەك ءبىزدىڭ ەلدە عانا ەمەس. بۇل ماسەلەنى شەشۋ ءۇشىن جاتاقحانالار كوپتەپ سالىنۋى كەرەك. باعا تاپشىلىقتان كوتەرىلىپ جاتىر»، - دەيدى مامان.