الماتى قالاسىنىڭ مەدەۋ اۋدانىندا پوليسيا قىزمەتكەرلەرى ايەلگە شابۋىل جاساعان قاراقشىنى جەدەل انىقتاپ، ۇستادى.
قىلمىس كوپقاباتتى تۇرعىن ءۇيدىڭ كىرەبەرىسىندە ورىن العان، دەپ حابارلايدى aqshamnews.kz
بەلگىلى بولعانداي، ەر ادام تاۋلىكتىك جالعا پاتەر الۋ سىلتاۋىمەن ريەلتورمەن كەزدەسكەن. ەكەۋى وڭاشا قالعان ءساتتى پايدالانىپ، كۇدىكتى ايەلدى قورقىتىپ، كۇش قولدانامىن دەپ سەس كورسەتكەن. ول جابىرلەنۋشىنىڭ ۇيالى تەلەفونىن تارتىپ الىپ، كەيىن جولدان ءوتىپ بارا جاتقان كولىكتى توقتاتىپ، وقيعا ورنىنان ءىزىن سۋىتقان.
- جەدەل-ىزدەستىرۋ شارالارى بارىسىندا كۇدىكتى تەز ارادا انىقتالىپ، قۇرىقتالدى. ءقازىر ول ۋاقىتشا قاماۋدا وتىر، – دەپ مالىمدەدى مەدەۋ اۋداندىق پوليسيا باسقارماسىنا قاراستى پوليسيا ءبولىمىنىڭ باسشىسى ەلدوس باقبەرگەنوۆ.
تەرگەۋ مۇددەسىنە بايلانىستى ق ر قىلمىستىق كودەكسىنىڭ 201-بابىنا سايكەس وزگە مالىمەتتەر جاريا ەتىلمەيدى. سونىمەن قاتار ق ر كونستيتۋسياسىنىڭ 77-بابىنىڭ 3ء-بولىمىنىڭ 1-تارماعىنا جانە ق ر قك-نىڭ 19-بابىنىڭ 1-تارماعىنا سايكەس، سوت ۇكىمى زاڭدى كۇشىنە ەنگەنگە دەيىن كەز كەلگەن ازامات كىناسىز دەپ تانىلادى.