الماتى قالاسىنىڭ اكىمى ەربولات دوسايەۆتىڭ تاپسىرماسىنا سايكەس، الماتى قالاسىنىڭ 2025 جىلعا دەيىنگى دامۋ باعدارلاماسىندا ستۋدەنتتەردىڭ تولىققاندى جاعدايىن قامتاماسىز ەتۋ ءۇشىن قالالىق وقۋ ورىندارىندا ءبىلىم بەرۋ، تۇرۋ جانە ستۋدەنتتەرگە قىزمەت كورسەتۋ ساپاسىن ارتتىرۋعا باعىتتالعان ادىستەمەلىك ۇسىنىستار ازىرلەۋ مىندەتى قويىلعان بولاتىن.
اتالعان باعىتتا الماتى قالاسى اكىمدىگىنىڭ جاستار ساياساتى باسقارماسىنىڭ قولداۋىمەن «وقۋ ورىندارىندا ستۋدەنتتەردىڭ وقۋ، ءومىر ءسۇرۋ جانە ولارعا قىزمەت كورسەتۋ ساپاسىن جاقسارتۋ بويىنشا ادىستەمەلىك ۇسىنىمدار ازىرلەۋ» جوباسى جۇزەگە اسۋدا، دەپ حابارلايدى اlmaty-akshamy.kz.
وسى رەتتە، 9 قاراشادا الماتى قالاسىندا اتالعان جوبا اياسىنداعى العاشقى دوڭگەلەك ۇستەلدىڭ وتىرىسى ءوتتى. كەزدەسۋدە ۇكىمەتتىك ەمەس ۇيىمدار، ساراپشىلار قاۋىمداستىعى، قوعامدىق پىكىر كوشباسشىلارى، جەرگىلىكتى دەپۋتتار مەن ۋنيۆەرسيتەت پرورەكتورلارى ءوز ويلارىن ورتاعا سالىپ، ساراپشىلار زەرتتەۋ ناتيجەلەرىنىڭ ارالىق قورىتىندىسىن تالقىلادى.
الماتى قالاسىنىڭ ءماسليحات دەپۋتاتى ءاسيا اقانوۆانىڭ ايتۋىنشا، بۇل باستاما ەلىمىز بويىنشا العاش رەت الماتى قالاسىندا قولعا الىنۋدا. باستى ماقسات 35 ۋنيۆەرسيتەت شوعىرلانعان مەگاپوليس ءۇشىن ورتاق ادىستەمەلىك ۇسىنىمداردى ازىرلەۋ جانە ستاندارتتاردى بەكىتۋ.
«مىسالى، جوعارعى وقۋ ورنىندا ستۋدەنت ءۇشىن قانداي جاعداي جاسالۋى قاجەت؟ ستۋدەنتتىك جاتاقحانا قانداي ستاندارتتارعا ساي بولۋى شارت؟ مۇمكىندىگى شەكتەۋلى ستۋدەنتتەر ءۇشىن ينكليۋزيۆتى ورتانى قالاي قالىپتاستىرامىز دەگەن سۇراقتاردىڭ جاۋابىن ىزدەپ، ءبىرىڭعاي قۇجات قابىلدايتىن بولامىز. جوبا ناتيجەسى ءساتتى بولعان جاعدايدا، بۇل باستامانى رەسپۋبليكا بويىنشا جۇزەگە اسىرۋعا بولادى دەپ ويلايمىن. باستىسى ۋنيۆەرسيتەت باسشىلىعى وسى ادىستەمەلىك ۇسىنىمداردى قابىلداۋعا ءازىر بولۋى شارت»، - دەدى دەپۋتات.
ايتا كەتسەك، وسى ۋاقىتقا دەيىن جوبالىق ءفرونت-وفيستىڭ ۇيىمداستىرۋىمەن 40 ەكسپەرتتىڭ باسىن قوسقان 5 فوكۋس-توپ وتىرىسى، 60 رەسپوندەنت اراسىندا انكەتالىق ساۋالناما، قازىرگى تاڭدا 500 رەسپوندەنتتى قامتيتىن ساۋالناما جۇرگىزىلۋدە. الداعى ۋاقىتتا تاعى 4 دوڭگەلەك ۇستەل وتىرىسى ۇيىمداستىرىلاتىن بولادى. بۇگىنگى كۇننىڭ وزىندە جوبا اياسىندا 150-دەن استام ۇسىنىمدار كەلىپ ءتۇستى.