قازاقى نىشانداعى كيىمدەردى كيۋ ءداستۇرىن مەدەۋ اۋدانىندا ورنالاسقان 163 مەكتەپ-ليسەيى داستۇرگە اينالدىرۋدا، دەپ حابارلايدى almaty-akshamy.kz
قازاق ۇلكەنگە-قۇرمەت، كىشىگە ىزەت كورسەتىپ، سالتىن ساقتاعان، ءداستۇرىن ۇلىقتاعان ەل. سوناۋ ىقىلىم زاماننان ساقتالعان نەبىر ءسالت-داستۇرى، ءان-جىرى، وزىنە لايىق كيىمى بولعان. كوڭىلى دالاداي دارحان، قۇشاعىن وزگە ۇلت وكىلدەرىنە دە ايقارا اشاتىن حالقىمىزدى ەرەكشەلەپ تۇراتىن — سول كيىمدەرى.
اسەمدىككە، ادەمىلىككە جانى قۇمار حالقىمىز كيىمنىڭ كوزتارتارلىق بولعانىنا اسا قاتتى ءمان بەرگەن. كيىمنىڭ اربىرىنە «قازاق» ەكەندىگىمىزدى ايقىنداي ءتۇسۋى ءۇشىن ءتۇرلى ويۋلار سالىپ تىككەن. ويۋدىڭ جاسالۋىنا، ورنەگىنە قاراپ ءارقايسىسىنا ات بەرگەن.
مىسالى: ارقار ءمۇيىز، قوشقار ءمۇيىز، اي سىرعا سىندى ويۋ تۇرلەرى بار. وزدەرى كوشپەلى قازاق اتانىپ، تاۋدان سىرعا، سىردان قىرعا كوشىپ جۇرسە دە، ۇستىنەن ويۋلى شاپانى مەن ساپتاما ەتىگىن، باسىنان ويۋلى كيىز قالپاعىن تاستاماعان. قىزدارىمىز ويۋمەن ادىپتەلگەن بۇرمەلى ەتەك كويلەگىنە ساي قامزول كيىپ، شاشىنا دا ويۋلى شولپى تاعىپ، كۇلكىلەرى سىڭعىرلاپ قازاق قىزىنا ءتان سىپايىلىقپەن كيىنگەن.
سوڭعى جىلداردا قازاقشا كيىمدەردى تىگۋ جانە كيۋ كەڭىنەن ەتەك الىپ كەلەدى. ءساندى ۇلگىدەگى قازاقشا كيىمدەردى اسىرەسە تويلاردا، كونسەرتتتىك باعدارلامالاردا كيەتىن بولسا، ءقازىر جاس قىزدار ويۋلى تاقيا، كەلىندەرىمىز قازاقى نىشانداعى كويلەك-قامزولداردى كيىپ كوپشىلىكتىڭ كوزايىمىنا اينالىپ ءجۇر.
ءاربىر اپتانىڭ جۇما كۇنىن «ۇلتتىق كيىم كيۋ كۇنى» دەپ اتادى. وقۋشىلار دا، مۇعالىمدەر دە ۇلتتىق كيىمدە ءجۇرۋى—وتە كەرەمەت كورىنىس.
- ۇلتتىق كيىم كيۋگە ارنايى كۇن ارناپ، ونى داستۇرگە اينالدىرۋداعى ماقساتىمىز-وقۋشىلاردىڭ بويىنا ءبىلىم نارىمەن قوسا، ۇلتقا، ۇلتتىق قۇندىلىقتارعا دەگەن سۇيىسپەنشىلىكتى قوسا ەگۋ. بالا كەزىنەن ۇستىنە قازاقشا ويۋلى كيىمدى كيىپ وسكەن ءاربىر جاس ۇرپاق بولاشاقتا ەلىن، جەرىن ءسۇيىپ، ءداستۇرىن ۇمىتپايتىن ازامات بولارىنا سەنىمىمىز مول. ءبىزدىڭ مەكتەبىمىزدە ۇلت جاناشىرلارى ءوسىپ كەلە جاتقانى ءبىز ءۇشىن ۇلكەن ماقتانىش، - دەيدى مەكتەپ اكىمشىلىگى.