ساپالى، ۇزدىكسىز سۋمەن قامتاماسىز ەتۋ ماقساتىندا كاسىپورىندا ينجەنەرلىك جەلىلەردىڭ ينفراقۇرىلىمىن سالۋ جۇمىستارى جالعاسۋدا.
«الماتى سۋ» مكك باس ديرەكتورى ابدراسيلوۆ قايرات ايتاي ۇلى مەملەكەت باسشىسى قاسىم-جومارت توقايەۆتىڭ 2021 جىلعى قازاقستان حالقىنا ارناعان جولداۋىنان العان اسەرىمەن ءبولىستى، دەپ حابارلايدى Almaty-akshamy.kz
مەملەكەت باسشىسى پارلامەنت پالاتالارىنىڭ بىرلەسكەن وتىرىسىندا «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋىن جاريالادى. وندا «وڭىرلەردى دامىتۋدىڭ ۇلتتىق جوباسى اياسىندا 5 جىل ىشىندە حالىقتىڭ 100% تازا اۋىز سۋمەن قامتاماسىز ەتۋدى تاپسىرامىن! بۇل – ۇكىمەتتىڭ الدىندا تۇرعان باستى مىندەت»، – دەدى مەملەكەت باسشىسى.
«الماتى سۋ» كاسىپورنى - قالا حالقىن سۋىق سۋ مەن كارىز جەلىلەرىمەن قامتاماسىز ەتەتىن ءىرى ستراتەگيالىق مەكەمە. ساپالى، ۇزدىكسىز سۋمەن قامتاماسىز ەتۋ ماقساتىندا كاسىپورىندا ينجەنەرلىك جەلىلەردىڭ ينفراقۇرىلىمىن سالۋ جۇمىستارى جالعاسۋدا. قازىرگى تاڭدا «جاڭا الماتى» جوباسىنا ەرەكشە ءمان بەرىلۋدە. قالا اكىمى شاھارىمىزعا جاڭادان قوسىلىپ وتىرعان شاعىناۋدانداردى سۋمەن جانە كارىز جەلىلەرىمەن قامتاماسىز ەتۋدى قولعا الدى. بيىل 140 شاقىرىم جەلى جۇرگىزىلدى. 2021 جىلى 12 شاعىناۋداندا جۇمىستار اياقتالىپ، 2 جىلدا شامامەن 150 مىڭ قالا حالقى ورتالىقتاندىرىلعان سۋ مەن كارىز جەلىلەرىنە قول جەتكىزبەك.