ستانيسلاۆ كانكۋروۆ، الماتى قالاسى ءماسليحاتىنىڭ حاتشىسى: قازاق جەرىندە تابىلعان قاراجات ەل يگىلىگى ءۇشىن قىزمەت ەتۋى كەرەك

«Qazaqstan» تەلەارناسىنا بەرگەن سۇحباتىندا مەملەكەت باسشىسى قاسىم-جومارت توقايەۆ مەملەكەت پەن قوعامنىڭ دامۋىنا جانە زامان تالاپ ەتەتىن وزگەرىستەردى ەنگىزۋ جايلى ناقتى جانە تەرەڭ پىكىرلەر ايتتى.

قايعىلى قاڭتار وقيعاسىنىڭ سەبەپتەرى مەن سالدارلارى جان-جاقتى جانە تەرەڭ زەرتتەلەدى. بۇل مەملەكەت پەن قوعام ءۇشىن ۇلكەن ساباق بولعاندىعى تىلگە تيەك ەتىلدى. ءقازىر تەرگەۋ بارىسىندا ءاربىر ءىس بويىنشا ءادىل شەشىم شىعارۋ كەرەكتىگىن اتاپ ءوتتى. بۇل پرەزيدەنت ءۇشىن باستى پرينسيپ بولىپ قالادى.

ۇقشۇ اسكەرىنىڭ ۋاقىتىلى ەنگىزىلگەندىگى جانە بۇل شەشىم ەشبىر قارىزدارلىق ەمەس، كەرىسىنشە، ۇقشۇ كەلىسىمشارتى اياسىنداعى ءوزارا كومەك ەكەندىگى مالىمدەلدى. وداقتاس ەلدەر اسكەرى قازاقستان ىشىندەگى تۇراقتىلىقتى ساقتاۋعا اتسالىستى.

شەكارا مەن دوستىق كورشىلىك تە ساراپتالدى. قازاقستان رەسەيمەن ماڭگىلىك دوستىق پەن ستراتەگيالىق سەرىكتەستىك جونىندەگى ماڭىزدى قۇجاتقا قول قويعان. ەكى ەل شەكاراسى زاڭدى تۇردە بەكىتىلگەن. بۇل رەتتە پرەزيدەنت رەسەيلىك كەيبىر ازاماتتاردىڭ قازاقستاننىڭ سولتۇستىك وبلىستارى رەسەيگە تيەسىلى دەگەن پىكىردى قاتە وي دەدى.

قوعامدا قوردالانعان پروبلەما – حالىقتىڭ الەۋمەتتىك جاعدايىنىڭ تومەن ەكەندىگىن بىلەمىز. وسى رەتتە بايلىقتىڭ باسىم بولىگى كىشىگىرىم توپتا شوعىرلانعان. بۇل پروبلەما تىڭعىلىقتى شەشىلەدى. مونوپوليا مەن وليگوپوليانى جويۋ ماقساتى قويىلعان. وسىمەن بىرگە زاڭسىز جولمەن قول جەتكىزىلگەن جانە شەتەلگە اكەتىلگەن قاراجات ەلىمىزگە قايتارىلاتىن بولادى. پرەزيدەنت ۇكىمەتكە ەكى اي ىشىندە ناقتى ۇسىنىستاردى ەنگىزۋدى تاپسىردى. قازاق جەرىندە تابىلعان قاراجات ەل يگىلىگى ءۇشىن قىزمەت ەتۋى كەرەك.

قاسىم-جومارت كەمەل ۇلى الماتى قالاسىنا ەرەكشە توقتالىپ ءوتتى. سۇيىكتى قالامىزدىڭ شابۋىلدان كەيىن قالپىنا كەلۋى پرەزيدەنتتىڭ ءجىتى نازارىندا. قالا باسشىسى رەتىندە ەڭبەكقور جانە تاجىريبەسى مول ەربولات دوسايەۆتى وسى ماقساتتا تاعايىندادى. اكىم الدىندا قالانى قالپىنا كەلتىرۋ، زارداپ شەككەن كاسىپكەرلەر مەن ازاماتتارعا جاردەمدەسۋ مىندەتى اسا ماڭىزدى بولادى. الماتى ءماسليحاتىنىڭ دەپۋتاتتارى بۇل ارناداعى جۇمىسقا بەلسەندى ارالاسىپ كەلەدى جانە الداعى ۋاقىتتا دا بار كۇشىن سالادى.

حالقىمىزدىڭ بەرەكەسىن ۇلعايتۋ، تاۋەلسىز قازاقستاندى نىعايتىپ، ناقتى ىسپەن دارىپتەۋ ماڭىزدى. ءبىز پرەزيدەنتىمىزدىڭ وي-تۇجىرىمدارىن قولدايمىز جانە جاڭا قازاقستاندى قۇرۋعا ورتاق شوعىرلانۋىمىز قاجەت دەپ ەسەپتەيمىن.