جاقىندا «الاتاۋ» ءداستۇرلى ونەر تەاترىنىڭ ءبىر توپ اكتەرى تۇركيانىڭ ستامبۋل قالاسىنداعى ءبىلىم جەتىلدىرۋ كۋرسىنا اتتانىپ، انادولى ەلىنەن ەرەكشە سەزىممەن، شىعارماشىلىق شالقار شابىتپەن ورالدى.
ءبىر وزىندە 22 ميلليونعا جۋىق ادام قونىستانعان، 3 مىڭنان اسا مەشىتى بار، بوسفور تەڭىزىن جايلاعان تاريحى كونە، جاسامپاز شاھاردىڭ قىم-قۋىت تىرلىگى قىزىپ جاتىر. ونەر ماماندارى ۇلكەن اۋماقتى الىپ جاتقان اتاتۇرىك اتىنداعى مادەني ورتالىقتى تاماشالاپ، 2 000 ورىندىق وپەرا تەاترى مەن 800 ورىندىق دراما تەاترىنىڭ اكۋستيكالىق-تەحنيكالىق الەۋەتىن سەزىنىپ قايتتى.
«تەاتر اكتەرلەرى ءداستۇرلى ساحنا ونەرىمەن قاتار مۇندا اكتەرلىك شەبەرلىكتى ناسيحاتتايتىن تeyk sahna تەاترىنىڭ ۇستازدارى – سەدا وعۋز، بەركۋل ۋلۋسوي، ۋتكۋ چەتين سىندى كينو جانە تەاتر اكتەرلەرىنەن «قازىرگى تەاترعا كلاسسيكالىق پەسسالاردى بەيىمدەۋ» تاقىرىبىندا ءدارىس تىڭداپ، كەيىپكەر قۇرۋدان شەبەرلىك ساباقتارىنان وتتىك»، – دەدى قۋانىشىمەن بولىسكەن تەاترعا قاراستى كورۋ جانە ەستۋ مۇمكىندىگى شەكتەۋلى ازاماتتاردىڭ مادەني دەمالىسىن ۇيىمداستىرۋ ءبولىمىنىڭ قىزمەتكەرى، تانىمال جۋرناليست گۇلجانات شوناباي.
«الاتاۋداي» جاس تەاتردىڭ ايماڭداي اكتەرلەرى – داۋلەت اريپوۆ، اسەت ەسجان، دينارا تولەپبەرگەنوۆا، تيمۋر پيازوۆ، ەسەناي يلياسوۆ، «ۇلىتاۋ» توبىنىڭ دومبىراشىسى رۇستەم بايەكەيەۆ تۇرىك ارىپتەستەرمەن ەمەن-جارقىن پىكىرلەسىپ، ءوزارا تاجىريبە الماستى. «ەل تاۋەلسىزدىگى قارساڭىندا «الاتاۋ» ءداستۇرلى ونەر تەاترىنىڭ قوس بىردەي ءدۇلد ۇلى، دارىندى اكتەرلەر – اسەت ەسجان مەن شاتتىق ۋاتقان مەملەكەتتىك «دارىن» جاستار سىيلىعىمەن، ال بيشىلەر جەتەكشىسى، حورەوگراف جاننا جۇمابەك قىزى ق ر تەاتر قايراتكەرلەرى وداعىنىڭ «ەڭلىكگۇل» سىيلىعىمەن ماراپاتتالدى! ءسويتىپ، تۇركيادان قايتار كۇنى ءسۇيىنشى جاڭالىقتى ەستىپ، مەرەيىمىز تەڭىزدەي تاسىدى»، - دەدى ۇيىمداستىرۋ ءبولىمىنىڭ قىزمەتكەرى.
وسىناۋ ماراپات جاۋعان قۋانىشتى كۇنى لاۋرەاتتار ارىپتەستەرى الدىندا ماراپاتتالىپ، ستامبۋلداعى 3 كۇندىك بايىپتى باعدارلامانى ساتىمەن اياقتاعان ازاماتتارعا قۇرمەتپەن سەرتيفيكات تاپسىرىلدى. «ەل اسىرىپ، جەر تانىتىپ، ءتانىم-بىلىم كوكجيەگىمىزدى كەڭەيتۋگە مۇمكىندىك بەرگەن «الاتاۋ» تەاترىنىڭ اكىمشىلىگىنە، الماتى قالاسىنىڭ مادەنيەت باسقارماسىنا ۇلكەن ريزاشىلىعىمىزدى بىلدىرەمىز» دەيدى مەرەيى تاسىعان تەاتر ماماندارى.