قالدىباي ابەنوۆتىڭ جەكە قورى اشىلدى
ەل تاۋەلسىزدىگى مەرەكەسى قارساڭىندا الماتى قالاسىنىڭ مەملەكەتتىك ارحيۆىندە كينورەجيسسەر، سەناريست، قازاقستان كينەماتوگرافيستەر وداعىنىڭ مۇشەسى، ەتنوگراف، 1989 جىلى «قازاقفيلم» كينوستۋدياسىندا «جەلتوقسان» قوعامدىق ۇيىمىنىڭ نەگىزىن قالاعان «اللاجار»، «شاكارىم»، «ءجالاڭتوس ءباھادۇر» فيلمدەرىنىڭ اۆتورى جانە قويۋشى-رەجيسسەرى قالدىباي تورعاي ۇلى ابەنوۆتىڭ جەكە قورىنىڭ اشىلۋىنا بايلانىستى «قايتپاس، قايسار كينورەجيسسەر» اتتى ەسكە الۋ شاراسى ءوتتى.
ءىس-شارانى الماتى قالاسىنىڭ مەملەكەتتىك ارحيۆ ديرەكتورىنىڭ ورىنباسارى ايسۇلۋ يسالوۆا قۇتتىقتاۋ سوزبەن اشتى. ول ءوز سوزىندە قايتپاس قايسار كينورەجيسسەردىڭ جەكە قورىن جيناقتاۋعا جەلتوقسانشى ەرلان دەكەلبايەۆتىڭ كوپ ەڭبەك سىڭىرگەنىن جەتكىزدى. «جاقسىنىڭ جاقسىلىعىن ايت، نۇرى تاسىسىن» دەمەكشى، «اللاجار» ءفيلمىنىڭ كەيىپكەرى بولعان ەرلان ءابدىراشيت ۇلى قالدىباي اعاسىنىڭ تۋعان باۋىرىنداي ءومىر بويى جانىندا بولىپ، اۋىرعاندا قامقورلىق تانىتىپ، ەل باسىنا تونگەن پاندەميا كەزىندە دۇنيە سالعان رەجيسسەردىڭ جەرلەۋ ءراسىمىن ۇيىمداستىرىپ، ارتىندا قالعان بۇكىل مۇراعاتىن جارىققا شىعارۋ ءۇشىن تەر توگىپ جۇرگەنىن ەرەكشە اتاپ وتكەندى ورىندى دەپ ەسەپتەيمىن. سول ەڭبەكتىڭ جەمىسى – بۇگىنگى جەكە قور كورمەسىنە قوش كەلدىڭىزدەر! – دەدى ايسۇلۋ ماردەش قىزى.
ەسكە الۋ شاراسىن بەلگىلى جۋرناليست، «كازاحسكوە دەلو» توپتاماسىنىڭ اۆتورى كولباي ادىربەك ۇلى جۇرگىزدى. شاراعا قاتىسقان تاريح عىلىمىنىڭ كانديداتى، الاشتانۋشى قالامگەر بەيبىت قويشىبايەۆ، ونەر قايراتكەرى، «اللاجار» ءفيلمى ءتۇسىرىلىمى كەزىندە رەجيسسەردىڭ اسسيستەنتى بولعان ق ر مادەنيەت قايراتكەرى عازيزحان ءادىلحان ۇلى، جەلتوقسانشىلار – ەرلان دەكەلبايەۆ، كەنجەباي وتاربايەۆ، كۇنسۇلۋ شارييەۆا، الىبەك مۇزاففار، اماندىق رامازان، قالدىباي ابەنوۆتىڭ اپكەسى التىنكۇل ابەنوۆا، ۇلى فارابي مەن باسقا دا قوعام قايراتكەرلەرى ءوز ەستەلىگىمەن ءبولىسىپ، يگىلىكتى ءىس-شارانى ۇيىمداستىرعان ارحيۆ قىزمەتكەرلەرىنە ريزاشىلىعىن ءبىلدىردى.
قالدىباي ابەنوۆ جايلى جۇرەك تەبىرەنتەر ەستەلىكتەردەن سوڭ شاكىرتى ەرلان ءابدىراشيت ۇلىنىڭ ۇستازىنا ارناعان بەينەجازباسى كورسەتىلدى. ودان سوڭ شاراعا ارنايى شاقىرىلعان جەلتوقسانشىلار جەلتوقسان وقيعاسى كەزىندەگى قازاق جاستارىنىڭ باسىنان وتكەن قيىندىقتارى تۋرالى ايتىپ، مەملەكەتىمىزدىڭ تاۋەلسىزدىگىنىڭ قۇندىلىعىن تاعى ءبىر ايقىنداي ءتۇستى. ارحيۆ قىزمەتكەرلەرى اتىنان ءارحيۆتىڭ باس ساراپشىسى ءلايليا قاسىم قىزى، جەكە قورلاردى جيناقتاۋ ءبولىمىنىڭ باسشىسى ايگەرىم ءالجانوۆا كەلگەن قوناقتار مەن جەلتوقسانشىلارعا العىسىن ءبىلدىردى.