مەسەنات ءوز اۋدانىنىڭ ۇزدىك تۇلەكتەرىنە 5 جىلدان بەرى وسىنداي سەرتيفيكات بەرىپ كەلەدى
سولتۇستىك قازاقستان وبلىسىنىڭ كاسىپكەرى ءوز اۋدانىنىڭ مەكتەپ تۇلەكتەرىنە تۇرعىن ءۇي سەرتيفيكاتىن سىيلادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇگىن جامبىل اۋدانىندا 178 تۇلەك التىن ۇيا مەكتەبىمەن قوشتاستى. مەكتەپ ءبىتىرۋ كەشىندە جاستاردىڭ كەيبىرى اتتەستاتپەن بىرگە 100 مىڭ تەڭگەگە تۇرعىن ءۇي سەرتيفيكاتىن دا الدى. بۇل جەرگىلىكتى كاسىپكەردىڭ ۇزدىك تۇلەكتەرگە سىيى. سەرتيفيكاتقا يە بولعانداردىڭ 10-ى ۇزدىك اتتەستات السا، ەكەۋى «التىن بەلگى» يەگەرى.
ديلناز رومانوۆا قوجابەرگەن جىراۋ اتىنداعى پرەسنوۆكا جالپى ورتا ءبىلىم بەرۋ مەكتەبىنىڭ تۇلەگى. ول ۇبت-دا 117 بالل الدى.
«مەن اتام مەن اكەمنىڭ جولىن قۋىپ، تەحنيكالىق ماماندىقتى تاڭداماقپىن. مەكتەپتە سۇيىكتى ءپانىم فيزيكا بولدى. بۇگىنگى سىيلىققا قۋانىشتىمىن. بانكتە مىندەتتى تۇردە شوت اشامىز»، - دەيدى ديلناز رومانوۆا.
سالتاناتتى جيىنعا وتباسى بانك وكىلدەرى كەلىپ، سەرتيفيكاتتى قالاي ءتيىمدى پايدالانۋعا بولاتىنىن ايتتى.
«بۇل سەرتيفيكاتتار تۇلەكتەرگە بارلىق تۇرعىن ءۇي باعدارلاماسىنا قاتىسۋعا مۇمكىندىك بەرەدى. ولار ءوز اتىنا بانكتە شوت اشىپ، دەپوزيتتى ۇنەمى تولىقتىرىپ وتىرۋى قاجەت. كەيىن قاراجات جينالعاندا ەلىمىزدىڭ كەز كەلگەن قالاسىنان باسپانا الا الادى. ول اقشانى شەشىپ الۋعا دا بولادى. ءبىراق مەن قارجىنى الماي، كەرىسىنشە، ءبىزدىڭ بانكتە ونى تولىقتىرىپ وتىرۋعا كەڭەس بەرەمىن»، - دەيدى «وتباسى بانك» اق سقوف ديرەكتورى الماس جاپابايەۆ.
مەسەنات ءوز اۋدانىنىڭ ۇزدىك تۇلەكتەرىنە 5 جىلدان بەرى وسىنداي سەرتيفيكات بەرىپ كەلەدى. وسى ۋاقىتقا دەيىن 41 تۇلەككە قولداۋ كورسەتتى.