سقو-دا ءۇش كۇننەن بەرى تەپليچنوە اۋىلىنىڭ بوگەتى نىعايتىلىپ جاتىر

سقو اكىمى تەپليچنوە بوگەتىن نىعايتۋ جۇمىستارىن تاۋلىك بويى باقىلاۋعا الدى.

وڭىردە بوگەتتى نىعايتۋ جۇمىستارى ءۇش كۇننەن بەرى تاۋلىك بويى جۇرگىزىلىپ جاتىر، دەپ حابارلايدى aqshamnews.kz.

— ءۇش كۇننەن بەرى تاۋلىك بويى جۇمىس ىستەپ جاتىرمىز. تەپليچنىيداعى قورعانىس بوگەتىن نىعايتۋ بارىسى جەكە باقىلاۋىمدا. كەشە 30 مىڭ قادام ءجۇرىپ ءوتتىم، بۇگىن دە وسىنشا قاشىقتىقتى ەڭسەردىم، — دەپ جازدى ءوڭىر باسشىسى عاۋەز نۇرمۇحامبەتوۆ الەۋمەتتىك جەلىدە.

بوگەتتە قاجەتتى تەحنيكا بار، شاتىرلار تىگىلگەن، تاماقتاندىرۋ ۇيىمداستىرىلعان. جۇمىسقا 1،6 مىڭعا جۋىق ادام تارتىلعان — بۇل كاسىپورىندار مەن ۇيىمداردىڭ قىزمەتكەرلەرى، مەملەكەتتىك قىزمەتشىلەر، اسكەريلەر جانە قۇتقارۋشىلار. اۋداندار دا كومەك كورسەتىپ كەلەدى. كورشىلەس وڭىرلەردەن قۇتقارۋشىلار دا كەلدى. 90 مىڭ قاپ توسەلدى. سۋ تولتىرىلعان بوگەت ورناتىلدى. بوگەت استىنان سۋ اعۋىن بولدىرماۋ ءۇشىن سۇڭگۋىرلەر دە تارتىلۋدا. وبلىس اكىمى حالىقپەن كەزدەسىپ، بارلىق قيىندىققا قاراماستان تاۋلىك بويى ەڭبەك ەتىپ جۇرگەن ازاماتتارعا شىنايى العىسىن ءبىلدىردى.

— باستى مىندەت — ەلدى مەكەننىڭ تولىق قاۋىپسىزدىگىن قامتاماسىز ەتۋ. بارلىق ءقاۋىپ جويىلعانعا دەيىن جۇمىستى جالعاستىرا بەرەمىز، — دەدى وبلىس اكىمى.

ال تجم مالىمەتىنە سايكەس سولتۇستىك قازاقستان وبلىسى تەپليچنوە اۋىلىندا سۋ تاسقىنىنا قارسى ءىس-شارالار ءتورتىنشى كۇننەن بەرى ءۇزىلىسسىز، تاۋلىك بويى جۇرگىزىلىپ كەلەدى. بارلىق كۇش بوگەتتەردى نىعايتۋعا جانە ىقتيمال زارداپتاردى بولدىرماۋعا جۇمىرىلعان.