ماڭعىستاۋ وبلىسىنداعى وقۋشىلاردىڭ جاپپاي ۋلانۋ جاعدايى وقۋشىلاردىڭ تاماقتانۋىن ۇيىمداستىرۋدى مەملەكەتتىك باقىلاۋ تاسىلدەرىن وزگەرتۋ قاجەتتىگىن كورسەتتى، دەپ حابارلايدى aqshamnews.kz.
سانيتاريالىق-ەپيدەميولوگيالىق تالاپتاردى بۇزۋمەن بايلانىستى پروبلەمالاردى جۇيەلى شەشۋ ءۇشىن ق ر دەنساۋلىق ساقتاۋ مينيسترلىگى ءبىلىم بەرۋ نىساندارىن مەملەكەتتىك باقىلاۋدىڭ جاڭا تاسىلدەرىن ازىرلەدى.
ولار بالالار بولاتىن نىساندارعا ەرەكشە مارتەبە بەرۋگە، وبەكتيۆتى باعالاۋ ءۇشىن تەكسەرۋلەر تۋرالى الدىن الا حابارلامانى الىپ تاستاۋعا، سونداي-اق نىسانداردى سانيتاريالىق-ەپيدەميولوگيالىق تالاپتارعا سايكەس كەلتىرۋ ماقساتىندا مونيتورينگتىك ساپارلاردى ەنگىزۋگە باعىتتالعان.
قازىرگى ۋاقىتتا ق ر كاسىپكەرلىك كودەكسىندە كوزدەلگەن قولدانىستاعى نورمالار ۋاكىلەتتى ورگاندارعا بالالاردىڭ بارلىق بولۋ نىساندارىن مەملەكەتتىك باقىلاۋمەن تولىق قامتۋدى قامتاماسىز ەتۋگە مۇمكىندىك بەرمەيدى.
بۇعان دەيىن حابارلانعانداي، مەملەكەت باسشىسىنىڭ مەكتەپ اسحانالارىندا بالالاردى توپتىق ۋلانۋ فاكتىلەرى بويىنشا تاپسىرماسىنىڭ شەڭبەرىندە دەنساۋلىق ساقتاۋ مينيسترلىگى باس پروكۋراتۋرامەن كەلىسە وتىرىپ، ماڭعىستاۋ وبلىسىنىڭ ءبىلىم بەرۋ مەكەمەلەرىندە سانيتاريالىق-ەپيدەميولوگيالىق تالاپتاردىڭ ساقتالۋىنا جوسپاردان تىس تەكسەرۋ جۇرگىزۋدە.
وڭىردە تەكسەرۋ ءۇشىن بارلىعى 72 نىسان ايقىندالدى، بۇگىنگى تاڭدا 14 مەكتەپ اس بلوگى تەكسەرۋلەرمەن قامتىلدى.
ۋلانۋ جاعدايلارىن تەرگەپ-تەكسەرۋ جانە مەكتەپتەگى تاماقتانۋدىڭ قاۋىپسىزدىگىن قامتاماسىز ەتۋ ماقساتىندا وقۋ-اعارتۋ، دەنساۋلىق ساقتاۋ مينيسترلىگىن، باس پروكۋراتۋرانى قوسا العاندا، مۇددەلى ورگانداردىڭ وكىلدەرىنەن تۇراتىن ۆەدومستۆوارالىق جۇمىس توبى قۇرىلدى.
دەنساۋلىق ساقتاۋ مينيسترلىگىنەن ۆەدومستۆوارالىق جۇمىس توبىنىڭ قۇرامىنا اقتوبە، جامبىل، قوستاناي وبلىستارىنىڭ، الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتتەرىنەن جانە ق ر دسم «قوعامدىق دەنساۋلىق ساقتاۋ ۇلتتىق ورتالىعى» شجق رمك سانيتاريالىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعىنان 7 مامان ەنگىزىلدى.