15 قىركۇيەكتە سولتۇستىك قازاقستان وبلىسىنىڭ اكىمدىگى سۋ تاسقىنىنان زارداپ شەككەن بارلىق تۇرعىندى جاڭا جانە جوندەۋدەن وتكەن تۇرعىن ۇيلەرگە كوشىرۋ جۇمىستارىن اياقتادى.
سولتۇستىك قازاقستاندا بارلىعى 1394 ءۇي ساتىپ الىنىپ، 1899 ءۇي كۇردەلى جوندەۋدەن ءوتتى. پەتروپاۆلدا 700 ءۇي سالىنىپ، جاڭا «بىرلىك» شاعىن اۋدانىن قۇرادى. بۇگىندە مۇندا تاعى 173 ءۇيدىڭ قۇرىلىسى اياقتالدى. باسپانا كىلتتەرىن سالتاناتتى تۇردە تابىستاۋ راسىمىنە پرەمەر-مينيستردىڭ ورىنباسارى قانات بوزىمبايەۆ قاتىستى، دەپ حابارلايدى aqshamnews.kz ونەركاسىپ جانە قۇرىلىس مينيسترلىگىنە سىلتەمە جاساپ.
«تۇرعىندارعا توزىمدىلىك تانىتقانى ءۇشىن جانە ايماقتى قالپىنا كەلتىرۋگە اتسالىسقان بارلىق بيزنەس وكىلدەرىنە، اتاپ ايتساق، "قازاقستان حالقىنا" قورىنىڭ باسقارما ءتوراعاسى بولات بيداحمەت ۇلى جامىشيەۆ، "Kazakhmys" كورپوراسياسى ديرەكتورلار كەڭەسىنىڭ ءتوراعاسى ەدۋارد ۆيكتوروۆيچ وگاي، "Kaspi" كومپانياسى ديرەكتورلار كەڭەسىنىڭ ءتوراعاسى ۆياچەسلاۆ كونستانتينوۆيچ كيم، "KAZ Minerals Management" ديرەكتورلار كەڭەسىنىڭ ءتوراعاسى ولەگ نيكولايەۆيچ نوۆاچۋككە العىس ايتقىم كەلەدى. سىزدەرسىز ءبىز مۇنداي اۋقىمدى قۇرىلىستى 3،5 ايدا بىتىرە الماس ەدىك»، — دەدى پرەمەر-مينيستردىڭ ورىنباسارى.
بۇگىندە جاڭا «بىرلىك» شاعىن اۋدانىندا «Kaspi» كومپانياسى بالاباقشا قۇرىلىسىنا دەمەۋشىلىك ەتۋدە، 600 ورىندىق مەكتەپ سالۋ جوسپارلانىپ وتىر. جاقىندا ىقشام اۋدانعا اسفالت جول توسەلىپ، اۆتوبۋس قاتىنايتىن بولادى.
«بۇگىن مەن كوپتەن كۇتكەن ءۇيدىڭ كىلتىن العانىما وتە قۋانىشتىمىن. ءبارىمىز ءۇشىن بۇل تابيعي اپات وتە قيىن ءتيدى. الايدا، ءبىز توزىمدىلىك تانىتتىق. وسى ورايدا، ەلىمىزگە، مەملەكەت باسشىسىنا، اكىمدىككە جانە قۇرىلىسشىلارعا، كۇندىز-تۇنى دامىلسىز جۇمىس ىستەپ، ۇيلەرىمىزدى تەز ارادا تۇرعىزۋعا اتسالىسقان بارشا ازاماتقا العىس ايتامىن. مەن ويقالادا تۇردىم، ەندى جاڭا ۇيدە ءومىردى تىڭ سەرپىنمەن جالعاستىرامىز، بۇيىرسا مال مەن باقشام بولادى»، — دەدى اليما جامانكوزوۆا.
«مەن كۇللى قازاقستان حالقىنا كورسەتكەن كومەگى مەن قولداۋى ءۇشىن شەكسىز العىسىمدى بىلدىرەمىن. بۇعان دەيىن زارەچنىي كەنتىندە ۇلكەن وتباسىممەن 70 شارشى مەترلىك ۇيدە تۇرعانبىز. ەندى جاڭا اۋداندا كەڭ ءارى جارىق ءۇيىمىز بار. بۇگىن ءبارىمىز وتە قۋانىشتىمىز»، — دەيدى «بىرلىك» شاعىن اۋدانىنىڭ تۇرعىنى داۋرەن حامزين.
سولتۇستىك قازاقستان وبلىسىنىڭ تۇرعىندارىمەن بىرگە سۋ تاسقىنىنان زارداپ شەككەن باتىس قازاقستان جانە قوستاناي وبلىستارىنىڭ تۇرعىندارى جاڭا جانە جوندەۋدەن وتكەن ۇيلەرىنە تولىعىمەن قونىستاندى.