جىل باسىنان بەرى 125 جاعداي تىركەلگەن
سولتۇستىك قازاقستان وبلىسىندا ىشەك ينفەكسياسى كوبەيدى. جىل باسىنان بەرى 125 جاعداي تىركەلدى. ونىڭ جارتىسىنان كوبى 14 جاسقا دەيىنگى بالالار اراسىندا. مامانداردىڭ ايتۋىنشا، كورسەتكىش بۇدان دا كوپ بولۋى مۇمكىن. سەبەبى اتا-انالاردىڭ بارلىعى دارىگەر كومەگىنە جۇگىنە بەرمەيدى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
2022 جىلدىڭ 5 ايىندا سولتۇستىك قازاقستان وبلىسىندا ءجىتى ىشەك ينفەكسيالارىنىڭ 125 جاعدايى تىركەلدى. ولاردىڭ جارتىسى 14 جاسقا دەيىنگى بالالار اراسىندا تىركەلگەن. دەگەنمەن وتكەن جىلدىڭ سايكەس كەزەڭىمەن سالىستىرعاندا اۋرۋشاڭدىقتىڭ 21%-عا تومەندەگەنى بايقالادى.
«جاز – بۇل دەمالىس ۋاقىتى عانا ەمەس، سونىمەن قاتار كوپتەگەن قوزدىرعىشتاردىڭ كوبەيۋى ءۇشىن قولايلى ماۋسىم. ەرەسەكتەر مەن بالالار قولدىڭ نەگىزگى گيگيەناسىن ۇمىتىپ، جەمىستەر مەن كوكونىستەردى مۇقيات جۋۋدى ەلەمەيدى. تابيعاتتا دەمالۋ كەزىندە ونىمدەردى كوبىنەسە ۇزاق ۋاقىت جىلى جەردە قالدىرادى، بۇل ءوز كەزەگىندە قوزدىرعىشتاردىڭ كوبەيۋىنە ىقپال ەتىپ ىشەك ينفەكسيالارىنىڭ دامۋىنا اكەلۋى مۇمكىن. ءجىتى ىشەك ينفەكسياسى – بۇل پاتوگەندىك باكتەريالار، ۆيرۋستار تۋدىراتىن ينفەكسيالىق اۋرۋلارىنىڭ ۇلكەن توبى. ءجىتى ىشەك ينفەكسياسى بۇگىندە جۇقپالى پاتولوگيادا تۇماۋ مەن جەدەل رەسپيراتورلىق ينفەكسيالاردان كەيىنگى ورىندا»، - دەيدى سقو سانيتاريالىق-ەپيدەميولوگيالىق باقىلاۋ دەپارتامەنتىنىڭ باس مامانى ايناش ساعىندىقوۆا.
ءجىتى ىشەك ينفەكسيالارىنىڭ الدان الۋعا بولادى. ول ءۇشىن ماماندار تازالىق ساقتاۋعا كەڭەس بەرەدى.
«بالالاردىڭ ءجىتى ىشەك ينفەكسيالارىنىڭ الدىن الۋ ءۇشىن جەكە گيگيەنا ەرەجەلەرىن قاتاڭ ساقتاۋ كەرەك. قولدى سابىنمەن ءجيى جانە مۇقيات جۋۋ كەرەك. اسىرەسە تاماقتانار الدىندا جانە دارەتحاناعا بارعاننان كەيىن. قايناتىلعان، بوتەلكەدەگى نەمەسە كەپىلدەندىرىلگەن ساپالى سۋدى پايدالانۋ شارت. كوكونىستەردى، جەمىستەردى، جيدەكتەردى تۇتىنار الدىندا مۇقيات جۋۋعا كەڭەس بەرەمىن»، - دەيدى ايناش ساعىندىقوۆا.